WILLEMSTAD – Segun e investigashon den e kaso di 41 kilo di droga ku e kuarteto a purba pasa via pòst atraves di e negoshi Caribbean Cargo Services (C.C.S.) ta tumando lugá, a sali na kla ku Jerson Rosalina ta metí den muchu mas fechoria, pasobra durante e investigashon ku outoridatnan a hasi na su kas dia 7 di febrüari 2022 a haña 2 plantashi di mariwana konsistiendo di 1066 planchi di henep, anto tambe 4 patronchi skèrpi pa arma di kandela. Rosalina a bisa ku e sa duna e matanan ei awa i ku su intenshon tabata pa bende nan. Mas aleu tambe a haña riba Rosalina su telefon 12 pòtrèt i 6 vidio di pòrno di muchanan menor di edat (muchanan entre 2 pa 13 aña). Pero Rosalina a insistí ku ta lokenan el a haña via di gruponan di amigu ku sa manda whatsapp pe. Rosalina te asina leu no tabatin ningun pasado ku hustisia. Den sala di korte ayera sinembargo e tabatin masha hopi di aklará i manera ta konosí for di un prinsipio el a hasi komo si fuera e no tabata sa di nada, ku e ta inosente, e no konosé un di e akusadonan prinsipal, esta Meyer i ora ku el a hañ’é berdaderamente den pèrtá, konfrontá ku pruebanan kontundente, el a disidí di hasi uzo di su derechi di keda ketu. Abogadonan enkargá ku e defensa, esta señora mr. Atena Sulvaran, señora mr. Alicia Blonk, señor mr. Prevo, señor mr. Lie A Tjam a hasi tur loke tabata na nan alkanse pa hiba un bon defensa, pero wes mr. Verbeek finalmente a yega na e siguiente sentensia: Pa Meyer un kastigu di prizon di 24 luna di kua 6 luna kondishonal i un periodo di prueba di 3 aña, pa Chambers un kastigu di prizon di 25 luna di kua 6 luna kondishonal i un periodo di prueba di 3 aña, pa Jerson Rosalina un kastigu di prizon di 30 luna di kua 6 luna kondishonal i un periodo di prueba di 3 aña, pa Nava un kastigu di prizon di 16 luna di kua 8 luna kondishonal i un periodo di prueba di 3 aña. Pa tur e akusadonan ta konta ku mester deskitá e periodo ku nan a pasa den aresto preventivo.

WILLEMSTAD – E kaso di e siudadano Genaro Thodé, nasé na Boneiru i di 64 aña di edat ayera a yega na su punto di kulminashon na momento ku wes mr. G. Verbeek a dikta sentensia, kondenando e sospechoso aki na 4 aña kastigu di prizon.
E kaso aki su tratamentu a kuminsá 22 di desèmber 2021, kontinuando 23 di mart 2022, 6 di yüni 2022, 9 di sèptèmber 2022 i por último 30 di sèptèmber, anto ayera sí a yega na su punto final, basta Genaro Thodé no bai den apelashon (e tin 2 siman pa hasi esei).
Ta trata aki di violashon di e lei di droga (transakshon di 176 kilo di kokaina) i poseshon di arma di kandela durante e periodo 10 di ougùstùs 2019 òf en todo kaso durante luna di ougùstùs 2019.
Su abogadonan señor mr. Eldon “Peppie” Sulvaran i señora mr. Atena Sulvaran den e defensa di Thodé a insistí ku e detenshon tabata inkorekto, komo tal mester a konsiderá e akusashonnan di Ministerio Públiko inválido. Reglanan fundamental den e proseso di investigashon, segun e abogadonan a keda violá di manera ku no por papia di un proseso hustu, ni korekto. A hasi uzo di militarnan pa buska den kas di e sospechosonan, loke no tabatin un base hurídiko, segun e abogadonan.
Na Kòrsou for di aña 1996 no por hasi uzo di militarnan pa hasi e tipo di investigashonnan aki, komo tal militarnan no tin ningun outoridat reglamentario pa pèrsiguishonnan asina.
Tambe segun e abogadonan e kliente Thodé durante su interogashon na

WILLEMSTAD – E hòmber di orígen kolombiano ku yama Alain Joseph Ortega Tinoco di 40 aña di edat durante e periodo 1 di sèptèmber 2020 pa 10 di mart 2022 a violá un mucha muhé di 12 aña di edat. Ampliamente ta deskribí den e dokumentonan ofisial (dagfar) kiko e violashon aki a kontené eksaktamente i ku e akusado na sierto momento tabata gana e mucha menor di edat asina leu pa hasi e aktonan aki dor di hasi sierto promesanan ku dunamentu di plaka, telefon mobil, karchi di telefon i otro gestonan. Fiskal señora mr. Monique Dennaoui-Simon, ningun momento so no por a aseptá e pretenshon di parti di e akusado Alain Joseph Ortega Tinoco ku ta e mucha mes a provok’é pa kometé e aktonan di violensia seksual. E víktima en realidat ta subrina di e persona ku kende e hòmber aki tabata biba i tin relashon kuné. Ampliamente e kaso aki a bini na tratamentu ayera ku preguntanan skèrpi di parti di wes mr. G. Verbeek pa a abuzá di un mucha menor di edat. Kon el a sintié promé biaha ku e suseso aki a tuma lugá, anto ku despues e kos a para bira un kustumber. E akusado Alain Joseph Ortega Tinoco na sierto momento a rekonosé ku su komportashon tabata robes, pero a sigui bisa ku ta e mucha mes a provok’é. Natural un argumentu asina ei no tin ningun valides, mirando e enorme diskrepansia di edat, es mas, e hecho ku aki ta trata di un menor di edat ku e tempu ei apénas tabatin 12 aña di edat. Hende grandi mester tei pa protehá nos muchanan, sigur esnan menor di edat, tantu fiskal komo wes a sigui suprayá. Tambe e hòmber kolombiano Alain Joseph Ortega Tinoco kier a laga parse ku e mucha a bin ta chantagiá te ku e suseso aki a sali na klaridat. Famianan a bin sa te ku e kaso a bira un asuntu di hustisia i ku e hòmber mester a presentá den sala di korte ayera, akusá di violensia seksual. E víktima tabata yu di un tanta. Famianan di e víktima tabata presente den sala di korte ayera i ta sigur ku e relashon ku famia a daña pa semper. Wes mr. Verbeek finalmente a dikta e sentensia manera fiskal señora mr. Monique Dennaoui-Simon a demandá, esta un kastigu di prizon di 18 luna di kua 12 luna kondishonal.