Willenstad: Djasabra 7 ougùstùs, direktiva di Curacao Clean Up simbólikamente a ranka sali ku su kampaña di preparashon pa e ‘World Clean Up Day’. Pa e okashon aki e miembronan di direktiva, inspirá pa Weganan Olímpiko i e logronanan di nos atletanan, a hasi e sprent ku diferente artefakto ku ta uza durante e akshon mundial di limpiesa aki, organisá den 150 pais ront mundu riba mesun dia.
Pa di 9 bia ‘Curacao Clean Up’ ta organisá dia limpiesa rònt Kòrsou I pa di kuater biaha bou di e akshon mundial (World Clean Up Day ). E bia aki ta riba djasabra 18 di sèptèmber for di 7’or te ku 11 ‘or di mainta.

E meta di ‘Curacao Clean Up’ (CCU) ta:
• limpia sushi den kaya
• tuma akshon pa krea mas konsientisashon kon pa atendé ku sushi
• krea perspektiva pa solushonnan mas viabel i sostenibel pa eliminá sushi ilegal di kaya, playa i laman.

Nos ta konsiente ku no ta Gobièrnu su tarea so pa tene nos pais limpi. Mester keda konsientisá komunidat di importansia

di un isla limpi ku sigur no ta bon pa nos salú so, pero tampoko pa nos ekonomia (pensa riba e turista ku ta yega Kòrsou, gusta nos isla, pero semper ta reklamá ku ta sushi). Banda di limpiesa, informashon, konsientisashon, tambe ta lòbi konstantemente serka stakeholdernan importante pa Gobièrnu tuma desishonnan pa garantisá un Kòrsou mas limpi i ademas ta sigui insistí riba legislashon i aplikashon di esaki.

‘Curacao Clean Up’ (CCU) a lanta 9 aña pasá, pasobra e fundadórnan a konfrontá nan mes ku un isla sushi. Enbes di reklamá Gobièrnu, nan a organisá un dia Limpiesa Nashonal pa eliminá sushi ilegal di kaya, playa i laman huntu ku 2 mil persona ku a rekohé komo 500 mil kilo di sushi rònt Kòrsou, riba e di 3 djasabra den Sèptèmber. Despues un par di aña e fundashon a djòin e inisiativa mundial di ‘World Clean Up Day’.

Durante e 8 añanan di akshon di limpiesa, e fundashon a haña hopi eksperensia i a papia den ekstenso ku kasi tur grupo di interes. Tin hopi trabou mas pa realisá, pero e fundashon ta señalá un kambio positivo tambe. Meta prinsipal di e fundashon ta pa baha e sieguedat pa sushi (‘trash blindness’ ) paso komunidat mester bira mas konsiente ku sushi ku ta dualu (zwerfvuil) bentamentu di sushi den mondi ta inaseptabel riba nos isla. Nos a bira mas konsiente ku tiramentu di sushi afó, for di un bòter di serbes te ku sushi di konstrukshon, e ta trese mas komoshon bou di tur hende.

E aña aki, e direktiva di CCU a duna un presentashon na Parlamento di Kòrsou pa informá di su logronan di último 8 aña i 5 sugerensha práktiko pa Gobièrnu, pa por atendé e problema di sushi riba nos isla. Na luna di aprel relashoná ku dia mundial di tera a lansa e kampaña tokante limpiesa digital ku mester bira un aktividat kontinuo. Pa dia mundial di medioambiente i oseáno huntu ku boluntario a limpia den e aria di St. Joris den kombinashon ku Selikor i tambe a bai hasi limpiesa na Klein Kòrsou.

Danki na tur e instansia i boluntarionan ku a koperá i tur aña e entusiasmo a sigui krese. Komo 19.000 boluntario a rekohe 2.8 mion kiko di sushi ultimo akahonnan di limpiesa i e meta ta pa e di 9 edishon aki pasa 3 mion kilo di sushi.

Preparashonnan pa djasabra 18 sèptèmber awor a kuminsá pa algun siman kaba i e direktiva di CCU tin konfiansa ku boluntarionan atrobe lo inskribí na granèl. CCU ta rekordá un i tur un bes mas, ku e responsabilidat pa tene nos isla limpi di tur tipo di sushedat ta unu di nos mes.
Direktiva ke enfatisá ku un biá pa aña, pa 4 ora largu no ta sòru solamente pa un Kòrsou mas limpi , pero e ta un evento yená entusiasmo, motivashon i goso, konosementu di bo bario i tambe kiko hende ta hasi ku nan sushi.

Inskripshon ta habri for di awe. Por inskribí via www.worldcleanupday curacao.org. Pa mas informashon pa partisipá of pa spònsor e evento nashonal aki por manda un mail na CuracaoCleanUp @gmail.com

Ademas direktiva di Curaçao Clean Up ta spera manera a bira e kustumber ku boluntarionan i organisashon, kompania, instansia di gobièrnu i inisiativanan partikular lo bolbe koperá finansieramente i ku material p’asina un bes mas demostrá ku nos ta stima nos isla i ku nos ta bon Yu di Kòrsou.