Deporte
“Coach” Patrick Girigorie, Tata di J’Dah: “Vários skol na U.S.A. interesá den J’Dah”….
Deporte 5 Star a kombersá djarason mainta ampliamente ku Sr. Patrick Girigirie, Tata di e sensashon di nos sòftbòl femenino fastpitch ku ta J’Dah Girigorie.
Patrick ku tabata konosí komo vòlibòlista a interesá den picheo fastpitch pa por yuda su yu muhé, i realmente mester bisa ku e ta logrando.
….Klínika i Kurso
Na Estádos Unídos…
Patrick, o “Coach” Patrick a bai Estádos Unídos kaminda el a asistí na vários klínika i kurso, i ta trahando ku su yu muhé ya pa algun aña i tambe ku otro pichernan aki na Kòrsou.
…Patrick Lo No
Ta Ku Selekshon…
Patrick a bisa 5 Star djarason ku e lo no por bai ku selekshon nashonal ku den luna di novèmber tin kompromiso Panamerikano ku ta sirbi pa klasifikashon di vários kompetensia regional.
“Mi no por bai.
M’a kuminsá ku e asuntu aki pa yuda mucha.
E kos a bira poko di mas.
Mi tin kompromiso di trabou i no por ta tantu asina afó ku sòftbòl”, “Coach” Patrick ta splika.
…Hopi Tempu Ta
Bai Den Preparashon…
Tambe e kos no ta únikamente e asistensia na e kompromiso Internashonal.
Tin di train, tin di prepará hopi.
“Ora ku nos ta prepará ku selekshon ta training kasi tur dia.
Nos ta bai kore.
Nos ta bai landa pa resistensia.
Ta un sakrifisio enorme. No ta fásil”,e ta añadí.
….Ta Bayendo
Bon Ku J’Dah…
Pa loke ta su yu J’Dah e ta bisa ku ta bayendo bon kuné.
Te awor den e kampeonato J’Dah no a permití kareda den 4 wega.
El a tira tambe den klase A sin duna nada.
Patrick ta splika ku J’Dah ta train ku hopi smak. Fuera di esei e ta hopi dediká.
J’Dah ta mira wega di sòftbòl Internashonal kasi tur dia.
Ta p’esei mes mi ta kere ku e ta keda hopi trankil ora e ta picha.
…Vários Skol Interesá…
Patrick a rekonosé ku tin vários skol na Estádos Unídos ku tin interes den su yu muhé pa bin studia i hunga sòftbòl aya.
Tin asta scout ku a bin Kòrsou pa wak’e.
Ta te sèptèmber e skolnan por bisa kiko nan ta ofresé.
J’Dah ta bayendo Havo, i lo kontinuá sigur e kampeonato aki. Despues lo mira kiko ta sosodé.
Tur kos ta mustra ku e lo bai Merka pa studia i sigui picha aya.
…Selekshon di
Reino tambe a
mustra interes…
E Tata di J’Dah a rekonosé interes di selekshon di softball femenino di Reino den su yu. Tambe tin tim di Hulanda ku a mustra interes.
E kosnan ei tin nan kosnan aden i no ta fásil. Tambe “Coach” Patrick a revelá ku J’Dah a haña un invitashon pa picha na Argentina 25,26 i 27 di sèptèmber próksimo kaminda nan lo perkurá pa tur kos. Sinembargo e no ta kere ku esei lo sigui.
…No Ta Fásil Pa
J’Dah Manera Ántes…
Patrick ta rekonosé ku no ta fásil pa J’Dah manera ántes tampoko.
El a kuminsá na Havo.
E tin di siña.
Tin wega den siman.
Tin biaha wega ta kaba te despues di 12or.
E tin di drumi pa e lanta fresku pa bai skol.
Tambe pa loke ta selekshon, Patrick tin su preokupashon.
Tin training ku ta kuminsá 9or ku ta hopi lat pa un mucha ku tin di bai skol mainta.
Sí Patrick ta kontentu e manera ku J’Dah ta pichando den e kampeonato aktual.
E ta tirando meskos ku el a tira den “World Series” na Merka, i ta hopi trankil”.
Jasson Dominguez e prospekto prinsipal di New York Yankees ta hungando den triple A.
E la regresá mas lihé ku nan a pensa.
I den 3 wega den triple A e tin 11 turno na ku 2 hit konektá, tambe 2 base por bola.
E General Manager di Yankees Brian Cashman a bisa ku nan ta kontentu di sa ku Jasson Dominquez ta kla i ku nan lo por disponé di dje.
E la rekonosé huntu ku e manager Aaron Boone ku aworakí nan no tin chèns pa Dominguez ariba i ku nan ta kontentu ku loke ku nan tin.
PHILADELPHIA (C) – E ekipo di Liverpool bou di direktor tékniko Arne Slot a logra gana di e ekipo di Arsenal ku skor di 2-1.
E wega a keda hunga na Philadelphia kaminda ku Liverpool for di trempan a pika dilanti ku skor di 2-0.
Den e wega di Arsenal nos Jurrien Timber no a hunga.
Esaki ta bira e di dos viktoria ku Arne Slot na manda di e ekipo Liverpool.
MONACO (C) – E ekipo di Feyenoord ayera hungando den su kas na De Kuip a sufri otro derota.
Esaki ta bira tambe di dos derota di e ekipo di Feyenoord ya ku djadomingu último ela pèrdè ku un skor mahos di 5-0 kontra di Benfica.
E próksimo wega di Feyenoord lo ta djadomingu awor kontra PSV pa e kopa Johan Cruijff Schaal.
Na sosiegu e wega ta empatá ku skor di 1-1.
Daily Nobo
Covid-19 Statistics
Hamas a konfirmá ku nan lider a keda asesiná pa un misil na Iran
Antony Blinken a afirmá ku Merka no ta impliká den asesinato di Ismail Haniyeh
Maduro ta vinkulá: Lider di Tren de Aragua responsabel den e protesta kontra resultado ofisial elektoral
Gobiernu merikano a manda atvertensia: Serio den direkshon di Nicolas Maduro relashoná ku resultado di elekshon
