Mester rekonosé ku nos selekshon di baseball ku ta hungando den Serie del Caribe ta hasiendo un trabou sumamente bon.
Apesar di a pèrdè ayera den èkstra inning vs Colombia nos selekshon tin rekòrt di 2 ganá i 2 pèrdí, i un aktuashon sorprendente sigur ku tin e gran mayoria kontentu, paso tin hende ku nunka ta kontentu.
Deporte 5 Star tabata kritiko, i semper lo ta kritiko ora ta trata di deporte kompetitivo.
Nos mester rekonosé ku e aktuashon di nos selekshon a sorprendé nos. Nos a lanta i konosé Serie del Caribe, i si nos por hunga pareu ku e Paisnan fuerte aki ta algu grandi.
Apesar ku nos tin vários Big Leaguer, Kòrsou ta un isla chikí sin un liga profeshonal, i e resultadonan ta tremendo. Nos pitcheo a kue tur hende for di base.
Ta manera un hende a bisa ku nos “Scouting” tabata bon, paso nos a trese pitchernan ku ta yudando nos selekshon. Nos bateo a los, i ounke nos por tabata poko mas oportuno, nos por ta kontentu ku e ofensiva. Defensivamente for di un prinsipio lo mester tabata un parti fuerte, i nos ta demostrando esei tambe. Vários pelotero ta aportando sumamente bon: “Wecho” Schoop, tremendo, Jorge Sulvaran (Palu Jo) a yega di bisa ku ta trata aki di e mihó Schoop den baseball, Roger Bernadina tabata inmenso, fildeando i bateando, Temesch i Soliano sumamente bon, Jonathan Schoop a duna kátedra den defensa, Ray-Patrick Didder di Aruba bon.

“Coco” Balentien su bate no a los, pero ta trata aki di un “slugger”, ku kualke momento por saka e bala. Te awor tremendo nos selekshon, bèrdat nos lo tabata kontentu ku un o dos triunfo, pero di bèrdat nos tur mester ta sumamente satisfecho ku loke nos ta eksperensiando. Mester felisitá: Jedrek Magdalena, CTB, Minister Cijntje, Aska, Licores Maduro, Manager Hainley Statia i su staff boluntario i tur ku a sostené e proyekto aki. Nos ta muri sinsero i honesto. M’a kòrda riba Celfriedt Homoet (dfm) ku semper tabata bisa ora ku softball femenino bai afó i tabata Sali hunga bon. Homoet tabata bisa:”Bisa nan nos ta bai kas. Nos no ta hunga mas !!”…

Hainley Statia.