Trabou di e artista a keda selekshoná entre mas di 250 obra komo un di e 14 obranan ku a destaká.

Apertura di e eksposishon ‘Atlantic World Art Fair’ riba Artsy tabata djamars dia 1 di yuni. Artsy ta un plataforma digital internashonal kaminda galerianan i bendedó di arte di henter mundu ta organisá eksposishon i ofresé obranan di arte na benta.
Lisa Howie di Black Pony Gallery na Bermuda a invitá 8 hende muhé empredendó di arte di area di Karibe pa huntu laga e públiko internashonal sera konosí ku talentonan di nos area.
Mas o ménos 30 artista ta partisipá ku mas di 250 obra na e ekposishon virtual akí kaminda e bishitante eventualmente por kumpra e obranan di arte via Artsy. E eksposishon ta dura te dia 21 yuni. Meta di e eksposishon ta pa duna un kara na artistanan ku kasi nunka ekspertonan ta menshoná den nan kombersashonnan den mundu di arte.
Isolde Brielmaier, Asistent Professor na e Department of Photography, Imaging and Emerging Media na New York University’s Tisch School of the Arts i Franklin Sirmans, directeur Pérez Art Museum Miami (PAMM) a hasi apertura di e eksposishon. Durante e apertura nan a desvelá nan eskoho kuratorial. Esaki nos por sigui riba Youtube.
E kuradónan a skohe e siguiente artistanan:
Niels Reyes, Cherdai Hassell, Meredith Andrews, Teresa Kirby Smith , (Black Pony Gallery), Zohria Allen, (Olympia Gallery)
Joiri Minaya,, BBird Ronald Cyrille, Franz Caba, Deborah Jack, (Sour Grass),
Nyugen E. Smith. (Suzie Wong)
Mario Benjamin, (Gallery Monnin)
Carlo Wallé, Gallery Alma Blou
Rodell Warner, Tamika Galanis (TERN Gallery)

Sebastian Meltz Collazo, artista multidisciplinario di Puerto Rico ku ta traha na New York, a skibi algu hopi interesante riba e website di Artsy. E ta duna un bista hopi kla tokante nos area ku ta konsistí di asina tantu kultura i un historia hopi varia. Nos area no ta djis un espasio popular kaminda e turista ta gusta pasa vakashon. E ta un lugá kaminda hende ta biba, kaminda ketu bai nos ta ekperenshá divishon pa motibu di supreshon históriko. Ta un region kaminda henter un populshon di un isla manera Haiti ketu bai ta sinti efektonan di un revolushon ku a tuma lugá mas di 150 aña pasá i ku a pone un paro na e negoshi lukrativo di bendementu di hende.

Ta un region kaminda e poblashon konstantemente mester rekuprá di orkan, temblor, erupshon di volkan i awor tambe pandemia di COVID-9. Un region kaminda arte no ta riba lista di prioridat di niun gobiérnu. Ku e resultado ku tur kos ku tin de aber ku arte, manera materialnan básiko, ta keda karga ku impuestonan haltu.
Ta masha poko artista por tin su propio studio i tin hopi ku asta ta traha den nan kamber di drumi. Balkonnan ku bunita bista ta destiná pa e turista o e desaroyadó di real estate.
Tambe e restrikshonnan bankario pisá komo resultado di labamentu di plaka o otro aktonan kriminal ta trese otro komplikashonnan i ta reenforsá e manera ku mundu ta weta nos.
Tur esaki ta pone ku galeristanan, kuradónan i artistanan mester bringa kontra un muraya haltu, mientras nos tin un kuenta muchu mas riku di konta ku e kuentanan komun di sobrevivensia ku semper ta keda kontá.
E kolekshonista lokal hopi biaha tampoko no ta interesá den un historia doloroso. Ku Atlantic World Art Fair nos ke ofresé un bista muchu mas amplio di e diversidat di nos region.
Nos ta invitá e públiko pa drenta den nos komunidat i ekperenshá esaki manera e ta realmente, ku tur su diversidat di nashonnan i ekperenshanan ku esaki ta trese kuné.
Naturalmente nos ke bende tambe durante e feria aki pero pa nos ta hopi importante pa krea un klima kaminda e artista por ta eksitoso riba un nivel internashonal.