Sambil – Ayera den oranan di atardi ku e tim enkargá ku e ya tradishonal buki di mundial, a hasi un bunita gesto na tur ku ta sigui e deporte rei futbòl i prinsipalmente kampionato mundial di futbòl ku lo inisiá djadumingu awor na Qatar.
Den studionan di KONTENTU na Sambil, e tim tras di Buki Mundial 2022 a anunsiá ku pa promé biaha e buki mundial lo ta kompletamente digital i optenibel grátis.
Esaki ta nan di 9 edishon di Buki Mundial, kual proyekto a inisiá for di 1990.
Ta trata aki di e grupo di ruman i primunan Eldon ‘Peppie, Glenn i Lilo Sulvaran huntu ku Remfis ‘Empie’ Donker i Juni Marselia, kende nan ya pa 32 aña largu, durante di 9 mundial konsekutivo ta skibi un buki ku tur detaye i informashon di kampionato mundial di futbòl, kual e aña aki no ta otro.
E edishon 9 aki, sinembargo tabata digital, apesar ku ainda e ta karga e nòmber Buki di Mundial.
Ayera den studio di Kontentu na Sambil, e tim di 5, a splika ku e edishon aki ta un regalo pa Kòrsou i mundu kompletu, pero prinsipalmente tur hende ku ta komprondé papiamentu.
A kompartí ku miembronan di prensa deportivo kende tabata presente riba kon a kuminsá for di 32 aña pasá te awor i kon tur kos ta bai kada 4 aña, pa por yega na e produkto final, ku e aña aki a bira un buki digital, ku gratuitamente un i tur por lesa riba nan telefon i/òf lèptòp entre otro, kual por keda konsiderá e buki di mundial, ku mas informashon rònt mundu, ku ta konta ku alrededor di 100 página di informashon.
Konosido komentarista di futbòl na radio, kende ta tio di Jurrien Timber, kende tambe ta na mundial ku selekshon Hulanda, ‘Kiki’ Timber, huntu ku Durley Mambi, hóben futbolista, defensor di e ekipo U-15 di e organisashon trikolor di Jong Holland, tabata e dosnan ku a klik riba e lèptòp, pa asina di forma ofisial hasi e Buki di mundial, aksesibel pa un i tur.
A probechá tambe pa gradisí esnan ku semper a koperá, unda a hasi entrega di un rekuerdo na representante di MCB, ku ta un di e spònsernan di e buki, ku durante di tur e 9 edishonnan tabata presente.
‘Peppie’ huntu ku ‘Empie’ a hasi e entrega na Caroline ‘Cora’ Sluis, kende tambe a hiba algun palabra i entre otro a gradisí i splika di ta sigur kontentu, un biaha mas, ku e tim i e produkto final.
Pues awor un i tur riba wepsait di VigilanteKòrsou.news, por klik i download nan ‘Buki di Mundial’ grátis.
Esaki unda ku tambe ya e ta bayendo rònt den diferente gruponan i via di demas appnan.

Cora Sluis hibando palabra den representashon di MCB.