Lokal
BRAYSER MARTIS TAMBE KONDENÁ DEN KASO NAUTICA
WILLEMSTAD – E kaso tratá den sala di korte ku a haña e nòmber ‘Nautica’ tin di haber ku empleadonan di duana metí den pasamentu di 21930 gram di kokaina dia 21 si aprel 2022.
Anteriormente, esta 15 di ougùstùs 2022 i 19 di sèptèmber 2022 ya e duo Rudsel Bernadina (60) i Edsel Engelhardt (61) a keda kondená na kastigunan di 42 i 45 luna di prizon. Ayera pa e mesun kaso aki a atendé ku otro persona tambe metí den e kòmplòt pa pasa droga, esta Brayser Martis di 27 aña di edat.
Pero e sospecho kontra di Brayser Martis tabata pa tantu kaso ‘Nautica’ komo eksportashon di 1195 gram di kokaina via e empresa DHL dia 29 di novèmber 2021.
Brayser Martis a presentá den sala di korte ayera ku abogado mr. Eldon “Peppie” Sulvaran pa su defensa. Wes mr. G. Verbeek a tuma bastante tempu pa hasi pregunta, kaminda a aklará partinan esensial di kòmbersashonnan telefóniko ku Brayser Martis a sostené ku esnan metí esta Engelhardt i Bernadina, e palabrashonnan ku a hasi, detayenan riba ken lo mester laga pasa ku e droga, kua koló di paña esaki tin bistí. Ademas a para ketu na detayenan manera informashonnan ku a kore via whatsapp, asuntu di pòtrèt pa identifiká e persona, e suma di Nafl. 10.000,— pa soborná Engelhardt.
Tambe kòmbersashonnan ku a tuma lugá na sitionan manera Esperamos, Palu Blanku i Seru Fortunaweg. E nòmber di un tal James ku lo a yama na telefon despues ku a interseptá e droga. Tur esakinan ta tópikonan ku a bini padilanti ayera durante tratamentu di e kaso i pa kua wes mr. G. Verbeek ku hopi insistensia tabata buska aklarashon.
Pa kuminsá Brayer Martis mester a responsabilisá su mes pa eksportashon di kokaina atraves di un pakete èksprès mandá pa DHL di dia 29 di novèmber 2021, kual pakete tabata destiná pa Andres Fecunda bibá na Den Haag.
Duana a habri e pakete ei i a konstatá ku den e 3 ènvelòpnan ku mapanan di plèstik tabatin droga, esta kokaina. Tabata un puiru blanku loke a haña ku mas aleu a keda investigá.
Brayer Martis a atmití su kulpabilidat den esaki. El a kumpli di e forma aki ku un fabor ku el a hasi un otro siudadano, risibiendo e suma di Nafl. 250,— komo rekompensa. Brayser Martis a bisa ku el a hasié, pasobra e tabata den nesesidat di plaka, pero ku e lo no ke menshoná ningun nòmber, pasobra e ta teme pa su bida.
Pa loke ta e kaso ‘Nautica’ den kua tambe Brayser Martis ta metí, tur kos a kuminsá ku detenshon di Rudsel Bernadina dia 21 di aprel 2022 na aeropuerto Hato, kende tabata di biahe pa Bèlgika
. Den un ‘rugtas’ i un maleta tabatin e kokaina. E transportashon aki lo mester tabata riba enkargo di un tal ‘Subrino’ ku a duna e siguransa ku e no mester prekupá pa nada, pasobra tur kos tabata bon reglá pa pasa ku e droga sin ningun problema.
Lo no tin ningun duanero korupto presente ku lo por stroba kos! Pero, hopi lihé a bin sali na kla ku aki lo mester tin di haber ku un ‘inside job’. Komo tal deklarashonnan di e testigunan Reijna i Elodie, kombiná ku imágennan di kámara a tira un otro lus riba e komportashon di Engelhardt di manera ku a sali na klaridat ku Engelhardt tambe ta metí den e kòmplòt. El a hasi su mes kulpabel na intento di eksportashon di e droga (òf por papia aki di ta kómplise). Engelhardt na su turno a basha abou, bisando ku ta Brayser Martis a mand’é hasi loke el a hasi ku e promesa di risibí Nafl. 10.000,— E duo Engelhardt i Martis na algun okashon a topa otro pa plania kon kosnan mester kana pa por pasa e droga. Hasta despues ku a interseptá e droga nan a topa pa papia i plania. Remarkabel ta e hecho ku Brayser Martis tin bon konosementu di tur loke ta pasa na aeropuerto Hato, e tabata sa kon kada kos lo tin di kana. Hasta a krea e fuerte sospecho ku Brayser Martis lo mester tabata envolví den mas kasonan di eksportashon di droga.
Pues no ta ekskluí e posibilidat ku e akusado aki lo tabata den mas kasonan ilisito kometé den pasado. Straño segun fiskal ta ku Brayser Martis únikamente ta kontestá ku un ‘no’ redondamente i ta kai bèk riba su derechi di keda ketu i no duna ningun komentario pa trese aklarashon. Hasta na momento ku Martis tabata será den SDKK a tendé papia na telefon, bisando ku Engelhardt a basha abou i a konta tur kos. Fiskal mr. Eva Bos, konkluyendo ku Brayser Martis ta kulpabel den ámbos akusashon kontra dje, a demandá un kastigu di prizon di 48 inkondishonal, ménos e periodo ku ya Brayser Martis a sinta kaba mará na e periodo di prueba di 3 aña. Abogado mr. Eldon ‘Peppie’ Sulvaran a opiná ku e kastigu pidí pa su kliente ta desproporshonal, pasobra tin kasonan resien konosí ku ta trata di muchu mas droga, pero ku a kaba den kastigunan muchu mas leve kompará ku esun di su kliente.
Tambe e abogado tabata kontra pa pone su kliente riba e mesun linia ku akusado Bernadina, kende tin un pasado muchu mas pió. Finalmente wes a dikta e sentensia, basando riba un kastigu di prizon di 45 luna di kua 9 luna kondishonal i un periodo di prueba di 3 aña.
WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.
KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.
WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.
Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.
Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.
Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).
Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).
Violensia relashonal
Kantidat: 15
Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.
WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.
Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.
Daily Nobo
Covid-19 Statistics
Hamas a konfirmá ku nan lider a keda asesiná pa un misil na Iran
Antony Blinken a afirmá ku Merka no ta impliká den asesinato di Ismail Haniyeh
Maduro ta vinkulá: Lider di Tren de Aragua responsabel den e protesta kontra resultado ofisial elektoral
Gobiernu merikano a manda atvertensia: Serio den direkshon di Nicolas Maduro relashoná ku resultado di elekshon
