NEW YORK – Kenneth Corey bosero di Kuerpo polisial na New York a konfirmá ku ayera aproksimadamente 12’or di mèrdia un hòmber a tira un pasahero den Metro mata sin ningun klase di provokashon.
Kenneth Corey a splika ku testigunan ku a presensia lokual a pasa a bisa ku e hòmber tabata kana nervioso pariba i abou durante e Metro tabata moviendo.
Na dado momentu ku e hòmber gordo kolo skur ku barba a nota ku nan tabata yegando na un parada ela disidí na saka un arma di kandela i tira un pasahero.
E sospechoso asesino aki a kuminsá menasa tur hende pa keda leu sino mas hende lo haña tiru di bala.
Ora e Metro a para kompletamente na northbound Q na Manhattan e kriminal aki a sali kore limpi bai.
E hendenan ku tabata den e Metro a yama polis i ambulans ku a yega hopi lihé.
Pero na momentu ku e víktima a yega hospital a konstatá ku ela fayesé.
Kenneth Corey a splika ku e víktima a keda identifiká komo Daniel Enriquez (48) ku tabata traha pa Goldman Sachs. Pa lokual ta e sospechoso te ainda outoridatnan no a logra detené pero lo no bai dura muchu ku polis lo bai detené.

CALIFORNIA .- Aña eskolar na Merka ta kabando i studiantenan ku pronto lo gradua i sigi nan destino pa otro skolnan ta organisando fiestanan di despedida.
Den e kaso aki djasabra anochi tabatin un fiesta di studiantenan ku pronto lo bai gradua na un skol sekundario na San Bernadino California.
E fiesta a kuminsá bon pero den oranan di mardugá un grupo di hóben ku no tabata invitá a yega i kuminsá buska problema. Lokual a pasa aki ta ku un di e hóbennan ku no tabata invitá na e fiesta a saka arma di kandela i kuminsá tira.
Konsekuensia di e akto aki ta ku 1 studiante a muri i nuebe otro a resultá seriamente herida.
Darren Goodman hefe di polis na San Bernardino a indika ku nan a logra detene e hoben ku a tira pero debi ku e tin apenas 16 aña no por duna informashon di su identidat.

WASHINGTON – Doktor Ashish Jha kordinadó den e lucha kontra Covid-19 pa e atministrashon di Biden a presentá e aktual panorama ku ta na kaminda.
Den e presentashon di Doktor Ashish na prensa ela indika ku tur hende a pensa ku coronavirus a disparsé.
Pero esaki no ta e kaso i ku práktikamente tur estado a baha nan restrikshonnan pa lokual ta medidanan kontra Covid-19.
Lokual ta mas alarmante den e kaso aki ta ku segun Doktor Ashish Jha a sobra solamente $1.900 mion riba reserva di e presupuesto pa kumpra bakuna.
Esaki ta nifiká ku fondonan ku gobiernu merikano tin pa kumpra bakuna pa kombatí Covid-19 ta kabando.
E situashon ta alarmante i ku kasonan di Covid-19 ta plamando di un forma bárbaro atrobe na nivel nashonal.
Doktor Ashish Jha a finalisá indikando ku teniendo kuenta ku e situashon aki atministrashon di Biden ta bai purba na persuadi pa Kongreso aprobá $22.500 mion adishonal pa Covid-19.