Hensley Meulens nos promé Big Leaguer i “Coach” den baseball di Grandes Ligas tabata ayera komo invitado di Gonzalo Cuales den su programa Konklushon na TV Dirèkt. Tabata un programa hopi interesante kaminda ku Hensley a konta di su eksperensia ku e organisashon di New York Yankees despues di a regresá e klup. Meulens manera ta konosí a kuminsá su karera den New York Yankees.

Temporada pasá e la wòrdu aserka pa bira asistente di “coach” di bateo, i e la firma pa 2 aña. Meulens tin tremendo palabra pa e bon trato ku e la haña serka NewYork Yankees. Hasta ta asina ku nan no kier a lague bai, pero e propietario dje organisashon Mr. Hal Steinbrenner no a bai di akuerdo pa paga Hensley mas ku e “coach” prinsipal di bateo.

Meulens a wòrdu aserká pa e organisashon di Colorado Rockies kaminda e la bira e “coach” di bateo prinsipal.

Puesto ku naturalmente e no por a ninga.

Sinembargo porta di New York Yankees semper lo ta habri pa Hensley paso e la bai for di nan sin niun problema.

Meulens a konta Gonzalo ayera dje gran aña di Aaron Judge ku a establesé un marka nobo di homerun pa Liga Amerikana. Judge tabatin un gran aña, liber di leshon i hopi konsentrá riba su trabou.

Na final e tabatin hopi preshon riba dje, i tabata te na último ku e la kibra e rekòrt di Roger Maris. Meulens ta kòrda ku su konseho tabata pa Judge tene su kabes riba e bala.

E promé Big Leaguer YDK ta rekonosé ku Aaron Judge ta un tremendo persona. Ora Meulens a felisita Aaron Judge, e estrea a bisa:”Sin bo lo mi no a logra !!”…