Lokal
ELUMAR BACHIELIE PA KANTIDAT DI KRIMEN KOMETÉ DEN KORTE
WILLEMSTAD – E siudadano Elumar Bachielie di 31 aña di edat tabata djabièrnè último den sala di korte atrobe. E tabata den kompania di su abogado mr. John Loth, kende di tur manera a trata pa suavisá e kastigu ku e akusado aki lo bai haña, pero den e kaso aki mester papia di un kousa pèrdí. Bachielie ta akusá di un kantidat di aktonan kastigabel kometé. Pa kuminsá 4 di òktober 2022 el a hòrta un televishon ku ta pèrtenesé na un siudadano di fam Petrona dor di kibra drenta den e kas. E mesun dia 4 di òktober 2022 Elumar Bachiele a hòrta 1 laptop i prendanan ku ta pèrtenesé na un persona di fam Smith. Atrobe Bachielie a logra drenta den kas di e hendenan aki dor di kiebro, destruyendo sea porta òf bentana pa asina ei por a logra hòrta propiedat di hende. Kontinuando ku su racha di ladronisia i kiebro, el a bai hòrta for di un siudadano di fam Brouwer, laptop, oloshi, prenda i sapatu. E di 5 akusashon kontra di Elumar Bachielie ta trata di e periodo 8 pa 10 di òktober 2022, kaminda di un persona di fam Herrera, e ladron ariba menshoná a bai ku 1 òf mas televishon, 1 eiskast, 1 mesa, stof i su fòrnu, plùs un outo Toyota modelo 4 Runner ku e plachi di number T 37-81. Aki Elumar Bachielie i eventual otronan ku tabata den su kompania a kibra diferente kandal, forsa portanan pa por a drenta i hòrta. Komo si fuera no ta basta ta asina ku ta bini aserka e akusashon ku dia 20 di aprel 2021 el a bai hòrta diferente hèrmènt for di un siudadano di fam Isenia, kon tal ku e ladronisianan di hèrmènt tabata durante e periodo 30 di aprel 2021 pa 17 di òktober 2022.
Durante tratamentu di su kaso, djabièrnè último Elumar Bachielie a sigui bastante largu na palabra, yamando atenshon pa tur sorto di otro faktor pa mustra ku no ta e i ku e ta inosente, anto ku akusashonnan kontra dje ta inkorekto. Fiskal a referí na resultadonan di investigashonnan ku a hasi di su telefon pa mustra ku konsientemente el a mantené kontakto ku hendenan ku kende e kier a bende e artefaktonan hòrtá. Tambe a mustra ku paden di un di e kasnan a haña su ‘fingerprint’ riba bentana. Pero, Elumar Bachielie a sigui ninga ku insistensia. E akusado Bachielie ya tin un kastigu bieu di 8 luna kologá riba su kabes. Ta komo si fuera un figura ku no sa nada otro, sino di mester drenta i sali prizon. Den e kaso aki segun fiskal di Ministerio Públiko señora mr. Ter Bog, e akusado Elumar Bachielie ta sigui ninga redondamente, ounke fiskal a yama atenshon riba e hecho ku a haña kosnan hòrtá den su kas i ku otro pruebanan kontundente. Hendenan ta traha duru, hasiendo tur sorto di sakrifisio pa bini na loke nan tin nesesidat di dje ku sodó di nan frenta, anto despues ta haña nan konfrontá ku Elumar Bachielie, kende ta bula den nan kas, bòltu e kas ariba bou pa saka kosnan hòrtá di nan propiedat bai kuné. Prinsipalmente e hecho di bòltu tur kos ariba abou den e kasnan ta sumamente doloroso i te hasta troumátiko. E akusado Bachielie, ningun momento so no a mustra arepentimentu i òf tabata habri pa skucha i duna muestra di konsiderashon ku loke tabata bini padilanti den su kontra. Pues ta argumentunan ku a konta pa fiskal a demandá un kastigu di prizon di 42 luna, mas e kastigu bieu di 8 luna. Abogado mr. John Loth mas bien a trata na suavisá mas tantu posibel i drecha kaminda pa ménos kastigu kontra di su kliente Bachielie. Wes mr. J. Sntiker finalmente a yega na un kastigu di prizon di 36 luna i tambe a honra sierto di e demandanan hasí pa daño i perwisio.
WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.
KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.
WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.
Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.
Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.
Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).
Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).
Violensia relashonal
Kantidat: 15
Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.
WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.
Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.
Daily Nobo
Covid-19 Statistics
Hamas a konfirmá ku nan lider a keda asesiná pa un misil na Iran
Antony Blinken a afirmá ku Merka no ta impliká den asesinato di Ismail Haniyeh
Maduro ta vinkulá: Lider di Tren de Aragua responsabel den e protesta kontra resultado ofisial elektoral
Gobiernu merikano a manda atvertensia: Serio den direkshon di Nicolas Maduro relashoná ku resultado di elekshon
