Lokal
Analista di ADC a haña retiro al instante pa fayonan garafal
WILLEMSTAD. Korte di Hustisia Komun di Aruba, Kòrsou i Boneiru i Islanan Ariba a konfirma e retiro al instante ku gerensia di Laboratorio ADC a duna un analista veterano pasobra durante un periodo basta largu e tabata firma ku ela hasi tèst di material di awa sin ku ela tèst e material.
Den e kaso aki tabata prinsipalmente awa ku ta sirbi na instansia i empresanan ku mester tin garantia ku e awa ku nan ta sirbi nan klientenan a perfektamente liber di kualke materia malu.
Loke gerensia a tum’é masha na malu ta ku ela falsifika e resultá i por a kousa un racha di malesa ku lo por tabatin konsekuensia te pafó di nos frontera.
Tabatin no un sino dos motibu poderoso pa duna e analista retiro al instante maske tabata asina ku e tabata hasi un tarea sin ku e tabata sufisiente prepará pe trabou spesifiko i sin ku nan a aliviá su peso di trabou.
Pero esei no tabata tur kos sino ku e analista no tabatin interes dje klientenan di ADC na pechu pa nan haña rapòrt na tempu i ku loke tabatin den e rapòrt, tabata veridiko i un kuenta di Kompa Nanzi.
Pa firma un rapòrt ku parsialmente ta inkorekto ta sumamente sensurabel i mas ku motibu válido pa duna retiro al instante. No solamente ela prepará rapòrt inkonfiabel pa klientenan sino ku un rapòrt di kalidat di awa por tabatin konsekuensia grave pa salubridat di hende.
E sirkunstansianan personal dje señora no ta hustifika su fayo i komishonnan sigur konsiderando su preparashon profeshonal.
Anto pa kolmo no ta un sino dos biaha ela haña retiro al instante di kual un biaha pa supordinashon.
Dia Korte a trata e kaso praktikamente tur hefe di sekshon tabata na korte pa kontesta preguntanan di wesnan.
E señora tabatin seis aña di servisio i ku su eksperensia e tabata un veterano den funshon di senior analist ku un salario di NAf 4.689,- pa luna.
Na 2019 ADC a tene algun inspekshon interno pa renobá nan akreditashon i e komishon a konstatá ku e analista di awa a kometé varios fayo.
Di otro banda dia ku personal di Sehos a pasa over pa CMC e no tabata kla ku preparashon pa hasi tur dos trabou.
Banda di su trabou diario e tabatin ku prepara un otro analista tambe.
E no por a saka konklushon korekto ora e haña resultado di tèst i kontrolnan a revelá diferente desviashon.
Dado momento mester a pone e analista riba non-aktif pa 10 i ku nan a prolongá ku 10 dia mas.
Pa evitá di haña retiro e analista a skirbi un karta indikando ku e ta dispuesto pa reanuda su trabou pero asina mes e no a hasi e tèstnan.
Den e periodo ei tres kliente a reklama ku nan no a haña resultado di prueba di awa i ku ela manda e resultadonan pa kliente sin sikiera a pasa banda di balie pa buska e awa ku e mester a analisá. Resto dje historia ta konosí: ela haña retiro al instante apesar di ta mama di dos yu i sin perspektiva di por haña trabou na otro laboratorio.
WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.
KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.
WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.
Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.
Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.
Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).
Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).
Violensia relashonal
Kantidat: 15
Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.
WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.
Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.
Daily Nobo
Covid-19 Statistics
Hamas a konfirmá ku nan lider a keda asesiná pa un misil na Iran
Antony Blinken a afirmá ku Merka no ta impliká den asesinato di Ismail Haniyeh
Maduro ta vinkulá: Lider di Tren de Aragua responsabel den e protesta kontra resultado ofisial elektoral
Gobiernu merikano a manda atvertensia: Serio den direkshon di Nicolas Maduro relashoná ku resultado di elekshon
