Despues di a topa na entiero di Raffy Jozefa algun eks integrante di Royal Scorpions a tuma e inisiativa pa organisá un aktividat chikí entre nan, pa despues mira kon por hasiele mas grandi den futuro.

Danki na eks pitcher estrea di Royal Scorpions Sr. Rignald Martina ku a pone su kas disponibel pa kuminsá ku algu ku lo mester bira mas grandi den futuro.
“Nos a topa na entiero di Raffy i pensa ku tin di bin huntu.

Spontaneamente algun eks miembro a tuma kontakto ku otro pa nos kuminsá ku algu ku mester bira algu grandi despues”, asina Rignald Martina a deklará.
Naturalmente pa hasi algu mas grandi lo mester di un espasio mas grandi tambe, paso e famia “Scorpion” ta enorme.
“Mi no ke pa niun hende sinti nan mes malu, o lubidá.

Ta algu ku nos a hasi basta riba man.
Ma papia ku Lonte i Taffy i nos a hasi algu”, e la splika.

E ambiente ku tabatin djasabra na kas di Rignald tabata dushi sigur, rekordando hopi kos prèt di ántes.

Tambe a probechá pa regalá eks manager, hungadó i dirigente Sr. Marcel Brighita un bunita “mug” pa e por dal su kofi.

Tambe a hasi algu similar ku Philip Elhage Jr. pa asina sa kuantu tabata stima su Tata “Lipo”, kende ounke no Scorpions tabata un gran amigu.
Quincy ku tabata na Serie Mundial a bini ku 4 kaha di bala pa “Coach” Ernst Meyer di Akademia Brievengat.

I tambe a regalá Taffy de Jongh un fungo-bat paso e ta gusta yuda tur hende ku ta deseá di train. Rignald a sigurá ku e aktividat aki lo bira mas grandi. “Nos lo tin di wak un lugá mas amplio, paso e famia “Scorpion” ta grandi.
Entre esnan ku tabat’ei presente tabatin: Ramiro Balentina, Kamala Merien, Rudson Roberto, Renny Leito, Lonte Balentin, Chapè Bernardus, Armin Konket, Ernst Meyer, Gensley Barlborda, Miguel Martina, Taffy de Jongh i naturalmente Marcel Brighita.
Lo hasi esfuerso sigur pa kontinuá ku e aktividat positivo aki.