WILLEMSTAD—Den dekada 80 i 90 mr Karyl Bertrand tabata un dje tenistanan di mas prometedor logrando sali kampeon hubenil di Korsou i Antias na varios okashon.
E virtutnan di un eks tenista el a sabi na komberti esaki den un pashon pa su trabounan komo abogado ku e ta ehersiendo no na nivel lokal so, sino internashonal. Dianan 29 i 30 di September Ministerio di Hustisia di Sint Maarten ta organisa un seminario tokante Propiedat Intelektual i Anti Pirateria.
Den e kuadro aki bufete di Bertrand Legal & IP Consultacy B.V. a keda aserka pa Ofisina di Propiedat Intelektual di Sint Marten pa ser un dje oradornan. mr. Karyl Bertrand a keda invita komo uniko abogado di Korsou pa partisipa den e seminario ku lo keda efektua na Simpson Bay Resort.
Esnan tambe ku lo partisipa n’e seminario aki ta entre otro kuerpo di douane i polisial di Sint Maarten i Minister di Hustisia di Sint Maarten. Tambe Ofisina di Propiedat Intelektual di Sint Maarten i huristanan di varios kompania di renombre mundial ku ta enkarga ku protekshon di marka riba nivel global i regional, representantenan di marka, kompanianan di St. Maarten i ekspertonan di merkadeo. mr. Karyl Bertrand no ta un deskonosi den Karibe pa lokual ta trata temanan di Propiedat Intelektual i Anti Pirateria.
Den pasado e tabata hasta miembro dje komishon Anti Pirateria di International Trademark Association (INTA) i a kordina un seminario tokante Anti Pirateria na Jamaica i Korsou. INTA t’e asosashon di huristanan di mas grandi na mundu kende anualmente sa organisa seminarionan ku partisipashon di mas di 10 mil miembro. INTA tin mas di 30 mil hurista ront mundu prosedente di mas di 190 pais i Korsou atraves di mr Karyl Bertrand tabata un digno miembro dje komishon menshona. Den kuadro dje seminario ku ta bai tuma luga na Sint Maarten, mr. Karyl Bertrand a keda aserka komo un eksperto pa trata e parti di Propiedat Intelektual i Anti Pirateria.