Despues di tabata in-aktivo pa dos aña i mei, miembronan di Kor Maestronan Penshoná (KMP) a bini huntu atrobe, riba djadumingu 15 di mei último,durante un atardi sosial, mashá ameno. Tabatin momentu di sosialisashon, músika di e banda di kor, charla informativo, wega, kanto, un sukulento almuerso i bibida pa freska garganta, tur esaki den un hòfi koosi, Hòfi Casper na Sta. Rosa. Tabata reina un ambiente hopi amikal i tur presente a gosa sin fin di e aktividat, organisá pa e Komishon ku ta dirigí KMP. Tur kos a kana na ora i bon organisá.

E aktual dirigènt di kor, sr. Frank Francisca, a duna di konosé na miembronan ku pa motibu di salú e lo no por sigui dirigí KMP, loke ta nifiká un pèrdida sigur pa KMP. Sra. Grace Goede, maestra di seremonia fiel di KMP tambe tabata presente. Miembronan a duna di konosé di ke sigui ku kor i a tuma e desishon pa start di nobo ku ensayo pa nan konsierto di hubileo. Pa motibu di covid esaki a kai na awa na aña 2020. Ku poder di Dios esaki lo tuma lugá na fin di òktober i lo keda dediká na sr. Frank Francisca. Diferente miembro a duna di konosé ku nan lo kier a stòp pero ora nan a bini i a sinti kon dushi tabata e ambiente den hòfi Casper i spesial ora a kanta e kantikanan, e nostalgia a bira asina grandi, ku einan mes nan a disidí ku nan ta keda. Sin mas KMP a yena un bashí na Kòrsou i ta pa e motibu ei, tur integrante ta kontentu ku pronto nan lo por ta para riba tarima atrobe pa duna tur nos hendenan, spesial e grupo di 60 plùs un atardi agradabel. E rekuerdonan ku e kantikanan di KMP ta asina grandi ku hopi hende ta sòru di ta presente pa nan por disfrutá.

KMP ta pidi tur su fanátikonan ku konstantemente ta keda puntra ki dia tin konsierto atrobe, pa keda pendiente! Un konseho ta pa manera anunsiá ku karchi ta na benta pa reserva/ kumpra bo karchi ya ku eksperensia ta demostrá ku TUR karchi ta kaba den un frega di wowo.
E potrètnan ta duna un impreshon kon e atardi sosial a transkurí.