Connect with us

Katoliko

Kiko ta un milager?

Published

on

Arnaldo Bazán

Nos ta papia di milager dilanti e echo di ku mester di un intervenshon spesial di Dios, ya ku e ta surpasá límitenan di e órden natural.

Bisá ku otro palabranan, milager ta un akontesimentu ineksplikabel dilanti di ku no ta keda nos otro remedi pa invoká lo sobrenatural.

Laga nos suponé ku tin un paralítiko ku nunka tabata por a kana i un persona ta bis’é: “Lanta i kana” i e persona ei ta obedesé, ta lanta para i ta kana, no pa un momento, sino ku e ta mantené su mes liber di e trabanan ku promé tabata strob’é di kana libremente. Aki nos ta dilanti presensia di un milager.

Awor, si nan a hiba e paralítiko akí na un spesialista ku a logra desaroyá un téknika kirúrgiko avansá i esaki, pa medio di un delikado i tenas  intervenshon ta debolbé e fakultat di kana, nos no tin milager, sino triunfo di inteligensia di hende.

Milagernan no ta un kaminda ordinario. Lo normal ta ku akontesimentunan ta desaroyá di forma natural, siguiendo leinan ku Dios mes a pone pa su ekspanshon

Pero den okashonnan spesial, pa puru dignidat di djE, i komo signo di Su poder i tambe di Su amor pa esnan ku ta pone konfiansa den djE, Dios ta realisá obranan maravioso, manera hopi di esnan ku nan ta konta nos den e páginanan di Santa Skritura.

E ser humano, ku tur esaki, a konfundí, mashá hopi be, e límitenan di e mundu natural i di esun sobrenatural. Esaki a permití di ta papia di milagernan kaminda únikamente a produsí un echo straño, si bo ke, pero perfektamente eksplikabel.

Loke ta sosodé ku hende no semper a disponé di e splikashon korekto pa kousa de su ignoransia personal o kolektivo.

Esaki a hib’é na atribuí na forsanan sobrenatural loke tabata forma parti di  Naturalesa. Ora esnan primitivo tabata testigu di un siklon, un teremoto, òf  un mal tempu ku bos i welek, pa pone ehemplonan, nan tabata pensa ku e diosnan tabata mashá rabiá i tabata trata di kalma nan ku sakrifisionan.

Ora un enfermedat a heridá nan, nan tabata konsiderá ku algun spiritu malu a poseshoná di un parti di nan kurpa , pa loke tabata nesesario ekspuls’é ku ritonan i orashonnan.

Pa e rason aki den tur pueblo primitivo un hasidó di brua a okupá un lugá importante, ku a hasi posibel ku tur kos straño tabatin su splikashon i solushon.

E ser humano poko poko a bai ta siñando i a realisá di ku Dios a duna leinan maravioso ku ta regulá Naturalesa. Asina por a deskubrí, ku hopi esfuerso i despues di hopi tempu, ku kada echo tin un kousa i ku, en general, por haña un splikashon pa tur kos.

E echo di ku e splikashonnan akí no por ser komprendé pa tur hende ta otro kos, pues e progreso sientífiko di humanidat no tabata tei mes, i miéntras tin personanan ku amplia kultura, tin hopi ku, pa rasonnan ku nan sea, t’asina atrasá den algun aspekto di konosementu manera esnan ku a biba míles di aña pasá.

Pa tur esakinan kosnan ta sigui ta funshonando igual. Nan mentalidat ta mágiko i ta rekurí konstantemente na lo maravioso pa splika e fenómenonan straño ku ta sosodé.

Ta pesei no por a kore ku e figura di hasidó di bruha, aunke awe ta yam’é kurandero, astrólogo, medium, spiritista, guru, òf loke sea.

Ya awe ta eksistí un siensia, parasikologia, dediká ta haña un splikashon  na loke ta parse di no tin, i por a deskubrí ku e mente humano tin un poder ekstraordinario, kousa real di hopi fenómenonan aparentemente ineksplikabel.

Por supuesto ku ningun progreso di siensia ta kapas pa anulá e poder de Dios i outentisidat di e berdadero milagernan. Pa un kristian i tambe pa otro kreyentenan, no tin duda algun di ku esakinan ta eksistí. No únikamente nos tin testimonio di e evangelionan sino di míles di aña di historia.

Sin embargo ta kumbiní, pa nos no kai den konfushon, pues hopi persona yen di bon fe, pero ignorante, ta papia di milager kaminda únikamente tin kosnan straño. Lo ordinario ta ku Dios sea e promé den reseta e leinan santu ku El a duna pa e órden rekto di Naturalesa.

Iglesia den esaki semper tabata masha kuidadoso, pa no krea konfushonnan grandi, pa loke e no ta aprobá fásilmente milagernan òf aparishonnan.

Di tur moda nos por i hasta pidi ku konfiansa ku ta produsí milagernan. Dios lo sa, den e último instansia, loke mas ta kumbiní. Ta e propio Hesus kende ta invitá nos pa pidi ku konfiansa i insistensia, sabiendo ku nos Tata lo duna nos tur loke nos mester den órden pa nos eterno salbashon.

Ke men, si asta boso ku ta mal hende sa di duna boso yunan kos bon, kuantu mas antó boso Tata den shelu lo no duna kos bon na esnan ku pidiÉ! (Mateo 7,11).

Continue Reading

Katoliko

Papa Francisco: Futuro saserdotenan mester ser evaluá integralmente

Published

on

By

Papa Francisco a bisa djabièrnè ku ora un persona ta konsiderá e vokashon saserdotal, ta nesesario evalu’é integralmente pa por tin saserdotenan ku ta kapas pa komuniká e bondat di Dios.
Asina e Tata Santu a indiká dn e Palasio Apostóliko di Vatikano, den e oudiensia konsedé na e formadornan di e Seminario Arzobispado de Milán (Italia), na okashon di e di 150 aniversario di e revista “La Scuola Cattolica” (E Skol Katóliko).
“Ora ta diserní si un persona por inisiá òf konsiderá un rekorido vokashonal, ta nesesario investig’é i evalu’é di moda integral”, Papa Francisco a splika den su diskurso djabièrnè 17 di yüni.
Den e sentido akí, el a kontinuá, “mester tene kuenta ku nan moda di biba afektonan, relashonnan, espasionan, ròlnan, responsabilidatnan, asina manera debilidatnan, temornan i desekilibrionan”.
“Henter e trayekto mester aktivá prosesonan ku ta buska na forma saserdotenan i esnan konsagrá madurá, ekspertonan den humanidat i serkania, i no funshonarionan di lo santu”, Papa Francisco a enfatisá.
Pa esaki, e Tata Santu a resaltá, “superiornan i formadornan di e seminario, esnan ku ta kompañá nan i e personanan den formashon ta yamá na krese diariamente na e plenitut di Kristu p’asina ku, atraves di e testimonio di kada un, e karidat di Kristu ta manifestá su mes mas klaramente”.
Papa Francisco tambe a bisa e formadornan ku “e seminaristanan i hóbennan den formashon mester por siña mas di boso bida ku di boso palabranan, nan mester por siña e bondat di boso obedensia, e trabou di boso dedikashon, e generosidat ku esnan pober di boso sobriedat i disponibilidat, paternidat di boso afekto kasto i no posesivo”.
“Nos ta konsagrá pa sirbi e Pueblo di Dios, pa atendé ku e heridanan di tur hende, kuminsando ku esnan mas pober”, Papa a enfatisá.
Mundu, Papa Francisco a kontinuá, “mester di saserdotenan kapas pa komuniká e bondat di Señor na esun ku ta eksperimentá piká i frakaso, saserdotenan eksperto den humanidat, pastornan dispuesto na kompartí alegria i sufrimentu di e rumannan, hòmbernan ku sa na skucha e gritu di esnan ku ta sufri”.
Renobashon i kuido di vokashonnan
E Tata Santu tambe a dediká un momento di su reflekshon na renobashon di vokashonnan saserdotal.
“Renobashon i futuro di vokashonnan ta posibel únikamente si tin saserdotenan, diákononan, esnan konsagrá i laikonan bon formá”, Papa Francisco a enfatisá.
“Kada vokashon partikular ta nase, krese i ta desaroyá su mes den kurason di Iglesia, i esnan ‘yamá’ no ta manera padestul ku ta aparesé diripiente. E mannan di Señor, ku ta duna forma na e ‘barinan di klei’, ta operá atraves di e kuido ku pasenshi di formadornan i kompañantenan.
Na nan, Papa Francisco a sigurá, “ta konfia e servisio delikado, eksperto i kompetente pa kuida e nasementu, e kompañamentu i disernimentu di vokashonnan, den un proseso ku ta rekerí hopi bondat i konfiansa”.
Servisio di teologia
E Tata Santu tambe a papia di e importansia di teologia i di e nesesidat pa por tin personanan kapas pa splika esaki na e mundu di awe.
E komunidat “mester di trabou di esnan ku ta buska na interpretá fe, tradusié i bolbe tradusié, pa hasié komprensibel, pa eksponé ku palabranan nobo: un trabou ku lo mester bolbe hasié di nobo ku kada generashon”.
Ta pesei, “Iglesia ta enkurashá i ta sostené e esfuerso aki, e difikultat pa bolbe definí kontenido di e fe den kada époka, den e dinamismo di e tradishon”.
Den e sentido akí, Papa Francisco a kontinuá, “e lenguahe teológiko semper mester ta bibu, dinámiko, e no por hasi otro ku evolushoná i preokupá su mes pa hasi su mes komprendibel”.
Papa ademas a mustra riba e papel iluminador di teologia den e mundu aktual kaminda a pèrdè sentido di kosnan.
“Un di e problemanan mas grandi di nos tempu ta en efekto e pèrdida di sentido. Teologia, awe mas ku nunka, tin e gran responsabilidat pa stimulá i orientá e búskeda, pa iluminá e kaminda”.

Continue Reading

Katoliko

Historia di dia di Tata

Published

on

By

Irónikamente, kreashon di dia di Tata, finalmente, a keda inspirá de un predikashi riba dia di mama. Na 1909, Sonora Smart Dodd de Spokane, Washington, a skucha un predikashi i a duna kuenta di ku su tata a meresé homenahe similar. E tabata Henry Jackson Smart, kunukero i veterano di guera sivil, kende a kria Sonora i su sinku yunan chikí despues di ku su esposa lo a muri dor di komplikashonnan durante nasementu di su di seis yu.
Sonora tabata ke un dia spesial pa su tata lo a sa kantu e tabata apresiá su amor i apnegashon, asina manera e sakrifisionan ku el a realisá komo tata soltero. Dia 19 di yüni 1910, riba dia di kumpleaño di Henry, Sonora a festehá e dia di Tata pa di promé bia na Spokane. Na 1924, Presidente Calvin Coolidge a apoyá públikamente e dia Nashonal di Tata. Finalmente, na 1966, Presidente Lyndon Johnson a firma un resolushon pa kombertí Dia di Tata den dia festivo nashonal. Seis aña mas lat, presidente Richard Nixon ta kombertié den lei permanente pa festehá dia di Tata riba e di tres djadumingu di yüni.
Sin embargo, e selebrashon akí ta varia di fecha den diferente pais di mundu. Algun ta konservá e di tres djadumingu di yüni, manera ta mayoria di e paisnan latinoamerikano, miéntras ku otronan ta preferá hasié dia 19 di mart, dia di San Hosé, manera ta e ehèmpel di Bolivia, Spaña i Honduras

Continue Reading

Katoliko

Di Shete Djadumingu di Pasku di Resurekshon

Published

on

By

Promé Lektura : Hechonan di apòstelnan 7, 55-60
Salmo : Salmo 97, 1-2. 6-7. 9
Di dos Lektura : Revelashon 22, 12-14. 16-17. 20
Evangelio : Huan 17, 20-26

E evangelio di awe ta ofresé nos un bunita okashon pa meditá den unidat. E ta bin ta ripití den e último añanan akí ku mundu ke logra integrashon kada be mas grandi entre pueblo i individuonan.Pa medio di FE nos sa ku moveshon di historia ta bai kondusiendo nos na realisashon di e soño asina largu sperá, e union den un solo famia. Nos tur ta anhelá un edat den kua no tin divishon i ku riba tera ta kuminsá un era di pas i di hermandat. Kristu den e ora mas solèm di su bida a resa pa unidat di hende: “Pa tur hende sea un.”
Uni hende ku otro i ku Dios ta e ideal i trabou di Iglesia. Pa e ideal akí si ta bal la pena inbertí tur nos energia. Pero promé laga nos mes un pregunta: Kiko ta unidat? Biba den unidat no ta nifiká pensa igual, sinti mesun kos, ku ta uni tur ser humano den un uniformidat laf i steril. Dos esposo sa ku ta uní no ta nifiká ku kada un mester pèrdè su personalidat. Unidat no ke men renunsiá na nos manera di pensa. Tampoko e ta nifiká semper keda ketu o keda sin defendé konvikshonnan propio.. Kiko e ora ei ta unidat ? Lo splik’é ku un frase hopi ripití, pero berdadero. Unidat ta e armonia kreá di diversidatnan. San Pablo ta splika e konsepto akí ku e imágen di e kurpa humano. “Ta un hecho ku e kurpa, siendo un, tin hopi parti , pero e partinan maske ku nan ta hopi, ta forma entre tur un solo kurpa”. Nos kurpa ta papiando ku nos di un maravioso unidat konstruí a base di diversidat. Ta logra e armonia akí pasobra tur parti di e kurpa ta traha, ta move, ta aktua den funshon di e konhunto.
Sosiedat ta konsistí di un variedat riku di hende. Tin múltiple rasa, lenga i kultura. Kada un ta poseé su propio rikesa.
Pa biba den unidat laga nos kuminsá na aseptá e diversidat ku ta eksistí den mundu. Nos no ta pretendé di biba den un paraiso irealístiko kaminda tur hende ta pensa igual i ta kana riba e mesun kaminda. Laga nos aseptá e desafio pa biba e unidat den e diversidat, pa logra armonia atraves di rèspèt pa variedat. Laga nos ta outéntiko den nos manera di pensa i di aktua i laga nos respetá e forma personal di pensa i di aktua di kada persona, semper i kuando esaki no afektá e bon komun.
Ta logra armonia ora kada hende kontribuí na e bon komun. E dos palabranan aki: bon komun, ta esnan ku mester inspirá nos akshonnan. Ora e interes personal i egoista ta pone su mes dilanti di e bon komun, e ora ei unidat i konkordansha ta kibra.
Kristu, ora e ta resa pa unidat, no ta pensando únikamente den un unidat horizontal, ke men di hende entre un ku otro. “Ku nan tambe ta ku nos”, Hesus a pidi den su orashon na Tata. En bèrdat, no por tin union duradero entre hende si Dios no ta e laso ku ta uni nos.

Sinembargo, kon difísil ainda ta e unidat entre kristiannan. No ta nesesario mira pafó i haña un mundu den guera konstante pa konkluí kon difísil ta di biba den unidat. Ta sufisiente pa nos mira un poko paden di nos mes pa deskubrí den nos propio sentimentu e rais di un divishon profundo. E rais akí ta nos egoismo.
Nos sa ku egoismo ta un forsa ku nos tur ta dirigí t’e na nos propio satisfakshon. Nos por bisa ku komo ser humano nos ta lèn den direkshon di egoismo, pero komo kristian nos mester obra ku amor. Stima ta nifiká sali di nos mes pa proyektá nos mes den direkshon di otro. Ora nos logra konvensé nos mes di e forsa konstruktivo ku amor ta enserá, únikamente e ora ei nos lo kuminsá traha riba e bon komun.
Den eukaristia kada djadumingu, nos ta selebrá e unidat di e famia kristian. Un solo Señor, un solo fe, un solo boutismo, un solo Dios I Tata. Tur loke tin den misa ta papia ku nos di unidat: altá ta e mesa di famia, kaminda komo ruman nos ta sinta pa kome di e mesun pan i pa bebe di e mesun biña. Ku ora nos sali di e tèmpel akí nos bai na praktiká e unidat i komunion ku nos a bin pa selebrá bibando den rèspèt mutuo i den amor, promoviendo e bon komun.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login