Willemstad – Próksimamente International Beautiful You Tour di Dewayne Williams (Mr Debonair) lo ta di bishita na Kòrsou tambe. ‘Beautiful You Fashion’ ta un organisashon ku ta hasiendo un gira mundial di kual nan lo bishita mas di 150 siudat òf pais i duna nan konosementu riba e tereno di beyesa, modelahe, diseño etc. Vários parti di Estádos Unídos, Afrika, Europa, Asia, Sur Amérika i den Karibe ta inkluí den nan gira i Kòrsou no ta un eksepshon. Dia 3 di Yuli próksimo International Beautiful You Fashion lo tin su show aki na Kòrsou.
E organisashon ta duna oportunidat na tur persona ku un dia kier biba e momentu di ta den un fashion shou òf ku ke biba e soño di ta riba tarima. Bo por ta profeshonal òf no profeshonal. Pa esnan ku no tin eksperensia den e mundu di modelahe, nan mester hasi un quick training serka Sherry di Mature Model Manegement ku tin un tim ku lo prepará nan. Despues di inskribí manual ta pasa pa hasi esaki digitalmente.
E show mes ta tuma lugá djadumingu 3 di yüli i ta duna oportunidat na tur sekso i di tur edat. Tambe personanan kòrtiku, haltu, diki, yen, curvy, plus size, flaku, tur ta bon bini. Tin oportunidat pa 100 persona i a keda algun lugá ainda. Training nan a kuminsá kaba serka Mature Model Management i por yama na numbernan di telefòn 676-4797, 526-0893 òf 514-4738 pa mas informashon of iskribi riba djadumingu entre 10’or di mainta pa 7’or di anochi na RooseveltCenter ariba mas 25 florin.
Modelonan di Mature Model Management ku forma parti di e show di moda dia 3 di Yuli lo por bai modelá pa e organisashon tambe den ‘Fashion Week’ na New York, bou di ouspisio di Plitzs Fashion Marketing, pa modelá den luna di sèptèmber.
Kasnan di moda ku ke forma parti di e show aki por òf diseñadónan ku ta deseá ekshibí nan trahenan, tambe esnan (Beginners) ku kier mustra nan kolekshon. Ya tin un diseñadó di Barbados ku ta bai bini ku su kolekshon di Urban, tambe di Kòrsou lo tei Eugenie Florentina, Kasnan di moda ‘Caprichos de Mujer’, ‘Kids Paradise’, ‘Asha African Assortment’, Shoe’ Niverse, te ku aworakí. Interesadonan ku tambe kier forma parti di e show aki por tuma kontakto ku Mature Model Management pa forma parti òf mas informashon.

‘Curaçao Magic Show’ kargá ku entretenimentu dia 4 di yüni próksimo

WILLEMSTAD – Djasabra 4 di yüni 2022 Brakkepput Mei Mei ta esenario pa Kòrsou risibí e popular mago JOEL EL MAGO pa un solo presentashon durante ‘Curaçao Magic Show’. Joel El Mago ta un di e magonan mas popular aktualmente despues di su partisipashon eksitoso na ‘Spain’s Got Talent’. Komo ganador di ‘Got Talent Magic’, Joel El Mago a yega na fama internashonal pa su trikinan di magia ku ta sorprendé tur públiko. Tur kos lo ta kla pa 7 ‘or di anochi e evento ranka sali pa entretené e públiko amante di espektakulo aki na Kòrsou. Ku presentashon speshal di Chòkòi i Explosion Dancers.

Joel El Mago kende su nòmber ta Joel Armando Hernández ta un mago outéntiko di 38 aña di edat. E ta originalmente di Cuba pero aktualmente e ta biba na Spaña. Na 2017 e a konkistá e públiko di Spaña ku su presentashon di magia sumamente gustá durante e show popular ‘Spain’s Got Talent’. Joel El Mago ta konosí pa su espektákulo úniko di magia basá riba su talento, ilushon i humor. Alabes e ta un persona ku karisma i ta interaktuá ku e públiko na un manera ku e públiko ta bira parti di e show.
Pues ta un show pa hinter famia. Muchanan te ku 13 aña ta paga NAF 20 florin. Karchi pa adulto ta kosta NAF 55 florin. Pa esnan ku ta deseá di sinta mas serka pa purba deskubrí e sekretonan di Joel El Mago tin karchi VIP Single disponibel pa NAF 85 florin. Mesa VIP di 6 persona ta kosta NAF 750 florin. Pa VIP ticket i mas informashon, por tuma kontakto via numbernan 512-7272, 561-3131 òf 512- 5700.

Karchinan ta optenibel entrante djaweps 12 di mei 2022 na Mensing’s Caminada, Bam Bam Tech Sports Zone, Beep Beep, Pompstation Sta. Maria i tambe ònlain via Tickets Caribbean. Magical Events huntu ku su partnernan Aquarian Pet Store, Magic Shawarma, Alves Supermarket, Vanddis, Vigilante i Daboussi Motors ta invitá pueblo di Kòrsou kompletu bin disfrutá di Joel El Mago dia 4 di yüni 2022 na Brakkeput Mei Mei.

WILLEMSTAD – Minister di Enseñansa, Siensia, Kultura i Deporte (ESKD), Sr. Sithree van Heydoorn, ta partisipá na pueblo di Kòrsou ku a proponé na Fundashon Kultural Seú Kòrsou (FKSK), pa marcha di seú tuma lugá riba djadumingu, 3 di yüli 2022. Esaki, despues di a hiba deliberashon ku diferente departamento di gobièrnu ku ta envolví ku trabounan pa ku marcha di seú.
Minister a pidi FKSK pa someté e kambio di fecha aki na aprobashon serka su miembronan. Den un reunion riba djárason, 6 di aprel último, gruponan a bai di akuerdo pa organisá un marcha den kuadro di Dia di Bandera. E marcha ta tuma lugá den e fin di siman di Dia di Bandera i ta kulminashon di un seri di aktividat den e fin siman di 1 pa 3 di yüli 2022.

 E aktividatnan akí ta kuminsá for di djabièrnè promé di yüli (pronto ta anunsiá e aktividat aki), siguí pa Dia di Bandera ku ta riba djasabra 2 yüli i kulminá djadumingu 3 di yüli 2022 ku e Marcha di Seú. E marcha tin komo lema “Seú ta bai Kaya” i e ruta ta di Tesoro Building, Franklin D. Rooseveltweg, pa Aqualectra na Otrobanda.