Zr.Ms. Groningen ta stòp un ‘go-fast’ riba laman ganchu

WILLEMSTAD – E barku di Marina Hulandes Zr.Ms. Groningen riba 24 di Mei a detektá un transporte di droga. Den Laman Karibe e barku patruyero a sabi di detené un ‘go-fast’ i detektá un kargamentu di 300 kilo di kokaina.
Despues di un patruya, un avion patruyero di Wardakosta Region Karibe a detektá un ‘go-fast’ ku kuater okupante, na e parti Nortost di Aruba. Despues di esaki Zr.Ms. Groningen a involukrá e helikòpter MH-65 Dolphin di Wardakosta Merikano, ku aktualmente ta na bordo di e barku patruyero. Despues ku e helikòpter a enkontrá e kontakto i a duna algun señal pa stòp, e ‘go-fast’ no a stòp. Pa e motibu ei a efektuá tirunan di atvertensha, despues di kua e kuater okupantenan a entregá nan mes.
Pa por a detené e okupantenan dos boto di intersepshon rápido (FRISC) a keda lansá den laman. E abordahe a keda ehekutá pa un tim kombiná di Law Enforcement Detachement (LEDET) di Wardakosta Merikano i e propio Fleet Marine Squadron (FMS). E okupantenan i e kontrabanda despues di esei a keda entregá na un barku di Wardakosta Merikano pa huisio na Estádos Unídos.
Zr.Ms. Groningen for di Aprel 2022 ta aktivo atrobe den e region komo barku patruyero pa Region Karibe, pa operashonnan antidroga.