Yureti Poulo, Manager di Selekshon: “Julisse Koffi ta den selekshon”… Ainda kuerpo tékniko no ta muchu kla..

Deporte 5 Star a kombersá awe mainta ku e flamante manager di nos selekshon di sòftbòl femenino fastpitch despues di a tuma nota den e konvokashon di hungadónan di pre/selekshon di Pichingolo ku Julisse Koffi no tabata konvoká.
Sinembargo Yureti Poulo ku ta manager a bisa 5 Star ku ta un fayo, i ku Julisse ku ta e batido di mas konsistente di nos sòftbòl último añanan ta den e pre/selekshon.
Yureti a bisa 5 Star ku e la skibi un nòmber dos biaha, pero ku Julisse lo haña su invitashon.

E manager a bisa 5 Star ku ainda no tin muchu klaridat pa loke ta su “coach-staff”.
Patrick Girigorie a informá basta tempu ku pa motibu di trabou e no por aseptá e kompromiso.
Esei ta konta tambe pa algun otro “coach”.

Si Emerick Agatha lo ta parti dje staf tékniko, i tin algun otro “coach” mas na linea, pero tin di bini un klaridat pa sa kon lo forma e kuerpo tékniko.