Yu’i Kòrsou kondená na 12 aña di prizon pa ròl di ‘get-away’

WILLEMSTAD. Pasku of no Pasku, friw ni kayente of e maldito virusnan ku a bin ta biaha rònt mundu na nan antoho pa krea kaos i morto den komunidat no ta stroba kurso di kada dia sigi normalmente na Ulanda pasobra ekonomia por slow un ratu pero despues ta sigi ku mas energia.
Igual ta konta pa trabou di Korte ku tin ku husga delinkuentenan ku den pasado resien a kometé fechoria i mester duna kuenta i rason.
Manera e Yu’i Kòrsou ku ayera a tende su veredikto pe kaso kaminda for di un bùs-van ela pasa riba kaya pa sefta un homber ku bala i ora polis a gar’é, e tabatin sinku bara di dinamita den su poder.
Tabata un akto kriminal serio ku por kalifiká hasta komo terorismo i ku Korte a kastiga ku 12 aña di prizon kual na su turno e kurasoleño a apelá.
Tabata aña pasá ku polis a arestá e yu’i Kòrsou di 48 aña di edat i su kaso a bai dilanti te ku ela keda kondená.
Tratamentu dje kaso a tuma lugá pero tabatin un ‘kink in de kabel’ pasobra e petishon di Ministerio Publiko no tabata firmá.
Pero tabatin splikashon pa esei: tabata den e momentonan kumbre ku Covid tabata mas peligroso i Korte a pèrmiti pa entrega un petishon di apelashon sin firma pa muchu hende no bòncha riba otro.
Ministerio Publiko na Amsterdam a pèrdè un kaso asina na Amsterdam pasobra nan a manda e petishon di apelashon firmá elektronikamente pero no tabata mes fiskal ku a trata e kaso.
Den e kaso grave aki Korte a eksigi pa tur paso tuma lugá di akuerdo ku regla pasobra un detaye lo pone nan pèrdè e kaso.
Despues di a klara e konfushon atministrativo por a prosede ku e kaso ku ta trata e intento di likidashon ku a tuma lugá dia 3 di desember 2018 na Utrecht kaminda e ‘wannabe’ asesino a los varios tiru di mitrayur riba su viktima.
E yu’i Kòrsou den e intento di asesinato tabatin e ròl di shofùr ne okashon ei.
Pero tabatin mas kaso pa kual e mester a duna kuenta i rason.

Dia 21 di mei di 2019 e tabata kore ku 5-5 kilo di dinamita den su outo pero no a logra eksplotá esaki.
Ne okashon ei e Yu’i Kòrsou tabata kore VW Transporter i ora polis a par’é, e no por a proba k e tabata bishitando un amiga.
Abogado dje yu’ Kòrsou a argumentá ku e hecho ku ela maneha un Volkswagen Transporter no ta prueba ku e tabatin intenshon di bai mata ningun hende ademas ta kon polis por pretendé ku ta su persona tabata den e Volkswagen e dia ei siendo ku e tabata disfrasá na Zwarte Piet.
Por tabata mas bien su bon amigu, ku tabata un surinameño bosneger ku tabata kune pero pa bisa ku ta su persona kier a mata hende, ta bai demasiado leu,
Ora nan a puntr’é ki mishi ku tabatin material genetiko den e Volkswagen, ela splika ku e ta mekaniko di outo i ta dje forma ei e material a resulta den e Volkswagen.
Sinembargo aki tabatin algu mas ku no ta kuadra pasobra ela bisa despues ku e no sa kore outo!
Pa fiskal, e kurasoleño mes tabata kore e Volkswagen maske ela ninga te na morto bisando ku ta serka un amiga kasá e tabata i no kier a hinka e amiga den problema.
Korte sinembargo a pone e kuenta dje akusado banda di e pruebanan di fiskal i a yega ne konklushon ku e ta gaña.

RELATO DI
VIKTIMA

E viktima a konta ku dia 3 di desèmber ela sali kas ku su outo Volkswagen Polo i a mira e Volkswagen Transporter pará den su kaya ta blokiá kaya.
Dado momento e porta dje Van Volkswagen a habri i un tipo bistí na Zwarte Piet a baha kuminsa basha bala riba dje.
Pa korte esei tabata prueba sufisiente.
Na momento di dikta kastigu, e tribunal a tene kuenta ku e pistolero a yega di kai será konsiderando gravedat dje kaso a dikta 14 aña di kastigu di prizon pero pa motibu di kambio den prosedura di atendé kaso, e tribunal a dikta 12 aña di kastigu.