Yufrou di ’bijles’ na St. Maarten…. Arestá pa abusu seksual kontra kantidat di menor!

PHILIPSBURG— Un empleado ku no ta forma parti di e personal dosente di un skol kristian na Sint Maarten a keda arestá e siman aki huntu ku su bisiña riba sospecho ku durante sigur dies aña e señora ku a traha ne skol tabata selektá menornan di edat pa práktika´’weganan’ seksual ku e menornan di edat i tabata kompartí e ‘hobby’ aki ku su bisiña na  Hillside Christian Schools J.D.W.

Djarason mainta polis tabatin sufisiente  indikashon pa arestá e duo riba e sospecho ku nan a abusá di ken sa kuantu menor di edat durante un periodo di sigur dies aña for di 2010 bin ariba.

Nan tabata laga e muchanan praktiká pornografia i filma esaki pa despues bende e material loke ta un  delito masha grave mes den leinan di Sint Maarten i di Reino.

E investigashon a haña e nomber Pandora i a kuminsa despues ku varios persona  a hasi keho  kontra e trahadó di e skol i su bisiña.

Primeramente ta un alumno a bati alarma ku e kordinadó di studiante  fin di luna pasá  di akuerdo ku un karta ku e mayornan a manda pa  Foundation for Protestant Christian Education dia 26 di mart ultimo. Direktiva dje fundashon a skòrs e empleado inmediatamente despues ku nan a tende dje kehonan.

Di akuerdo ku Ministerio Publiko, e muhé tabata konsentrá riba su viktimanan na skol pa despues di skol hiba e muchanan su kas kaminda e tabata duna bijles i tabata laga nan praktika pornografia.

E abusu seksual tin mas ku dies aña ta tuma lugá kaba pa diferente periodo.

Den un dje kasonan e muhé tabata abusá dje muchanan den lokal dje skol básiko mes i otro kaso di kual polis tin prueba patente ta un kaso na  2019 durante di Lockdown ora e mucha tabata haña bijles na un dje hendenan ku polis a arestá.

Ayera Ministerio Publiko a revelá e kaso den un komunikado di prensa.

Aparte dje alegashonnan di abusu seksual, polisnan a determina ku e señora ku ta traha ne skol básiko tabata saka foto pornografiko di por lo menos un mucha i a komparti esaki ku su bisiña. Tur e muchanan ta menor di 13 aña sigur tempu ku e fechorianan aki a pasa.

Outoridatnan a listra kas dje dos sospechosonan despues di nan detenshon i a konfiská telefon i kòmpiuter na ambos kas.

Pa nan sorpresa nan a haña un arma di kandela i mariwana na kas dje sospechoso prinsipal.

Ministerio Publiko a informa ku kasonan di abusu seksual ku menor ta delito serio  sumamente sensurabel  kontra esnan mas vulnerabel den komunidat.

Ministerio Publiko i Kuerpo Polisial  ta konsiente ku e kasonan aki ta lanta masha emoshon i a hasi un apelashon riba mayornan pa domina nan emoshon pasobra Polis i Ministerio Publiko ta trahando intensamente riba solushon di kasonan asina aki pa protekshon di komunidat i partikularmente e muchanan.

Nan a pidi publiko pa raportá kualke kos sospechoso ku nan tin na outoridatnan.