Yuda mucha cu cambio di cas pa scol

ORANJESTAD-Tempo pa bay scol bek ta casi yega. Ta tof pa muchanan haci e cambio di cas pa scol. Pesey ta importante pa duna nan oportunidad pa adapta bek. Tur hende, di mucha, mayor te maestro ta sinti nan poco nervioso riba prome dia di scol, pero cu tempo esaki lo bira rutina diario.

Ta importante pa enfatisa n’e mucha e cosnan positivo p.e. bo lo topa bo amigonan bieu, topa mucha nobo, bo ta bay uza cosnan nobo pa scol. Tambe ta importante pa papia cu bo yiu tocante su preocupacion y ofrece siguransa.

Porta e ta preocupa cu e no lo haya amigo/a nobo, of lo no bay bon cu su maestro nobo, of cu e terdo di aña pasa lo tey atrobe.

Ta consehabel pa ahusta bo schedule pa yuda e transicion bay mas suave posibel. Ta beneficioso si e prome siman tur dia bo tey na cas ora scol caba. Pero hopi tata y mama no tin e flexibilidad aki. Si esaki no ta posibel por percura cu pa atardi bo tey pa duna bo yiu e atencion cu e mester.

Pa yuda e mucha pa bay scol bek ta consehabel pa:

Cuminsa 1 of 2 siman prome cu scol cuminsa cu e rutina di drumi na ora. Tambe ta importante p’e yiu drumi suficiente dor di establece orario rasonabel di drumi p’asina mainta e por lanta bon sosega y cla pa siña.

Tur dia come desayuno saludabel p’e por ta mas alerto y por siña bon

Yud’e uza agenda pa nota su tareanan, etc.Yud‘e organisa su cosnan p.e. un anochi prome pone su huiswerk den tas y pon’e banda di porta, y pone su pañanan cla.

E checklist practico cu ta sigi aki por yuda tanto mucha como mayor cu baymento bek pa scol:

Kico pa bisti, hiba y come?

E scol tin un “dress code” y tin cierto cos cu mucha no mag bisti pa bay scol?

Muchanan mester cambia paña pa cierto les, p.e. les di educacion fisico?

E rugtas ta safe, ta di material leve, tin straps di schouder yena y hancho, tin varios compartimento?

Bo yiu sa con pa paketa su tas y con pa ward’e na manera safe na scol y cas?

Bo ta laga bo yiu hiba su coi come of e ta cumpr’e na scol? Kico ta loke nan ta bende na scol?

Bo yiu tin tur material necesario pa bay scol, p.e. lunchbox, map, etui?

Asuntonan medico?

Bo yiu tin tur su vacunacion? E scol y su maestro sa di cierto condicion medico di bo yiu, pe. alergia pa cierto alimento, asma, ta diabietico of di cualkier otro condicion cu mester tene na cuenta?

E maestro sa di un condicion cu por afecta siñamento di bo yiu, p.e. si e yiu tin ADHD cu e mester sinta dilanti den klas of si e yiu tin problema visual cu e mester sinta mas cerca di borchi?

Transporte y seguridad?

Si bo yiu ta bay cu bus, bo sa unda e bus ta para y ki ora e ta subi bus y ki ora e ta baha?

Bo sa unda ta baha y busca mucha na scol? Tin regla tocante uzo di bais?

Bo a repasa e reglanan di seguridad den trafico cu bo yiu, p.e. con pa crusa caya, uza zebrapad, nunca crusa dilanti bus, warda bus para completo prome cu subi?

Si e mester cana of bay cu bais scol, bo a palabra y fiha cu n’e e ruta mas safe? Bo yiu ta comprende cu nunca ta ok pa pidi y tuma lift, mangel of cualquier invitacion di hende cu e no conoce?

Cuido despues di scol: na unda?
Ta un reto special pa mayornan cu ta traha, pa regla e cuido y guia pa nan yiu despues di ora di scol. Depende di edad y grado di madures bo mester regla transporte y cuido y guia. Ta importante pa muchanan te cu 12/13 aña ta bou supervision di adulto responsabel.

Si bo no por tey ora scol caba, ta bon pa puntra un persona confiabel pa yuda bo. Si un hende ta bay busc’e despues di scol, sigura bo mes cu bo yiu sa unda pa topa e persona encarga.

Busca un centro di traimerdia pa sigura bo mes cu bo yiu ta keda na un lugar cu ta duna cuido, guia y entretenimento.  Pa haya nomber/tel.nr. di centronan di traimerdia por aserca Fundacion Pa Nos Muchanan.

Yuda cu huiswerk
Gusta of no huiswerk ta un parti importante di baymento di scol. Bo por haci algun cos pa yuda bo yiu drenta atrobe den e ambiente di haci huiswerk dor di:

Tin un lugar keto sin distraccion p’e haci huiswerk. No laga bo yiu wak television, mientras e ta haci huiswerk of studia.

Fiha regla cla pa haci huiswerk y pa ora di cende y paga television. Wak menos television ta mihor, specialmente durante siman.

Nunca haci huiswerk pa bo yiu, pero lag’e sa cu semper bo ta disponibel pa yuda of contesta su preguntanan.

Tur anochi revisa huiswerk pa wak si bo yiu a compronde su tarea/pregunta di scol.

Ta bon pa encurasha bo yiu pa desaroya bon custumber di studia: p’e scirbi anotacion, scirbi e tarea (opdracht) cla y entrega huiswerk na tempo. Tambe p’e tuma tempo pa haci su huiswerk y pa puntra su maestro ora e no ta comprende algo.

Pa sigura bo cu bo yiu bay bon na scol comunica regularmente cu su maestro. Papia tocante su progreso, su partinan fuerte y menos fuerte.

Sea ta prome dia di scol of ultimo dia, percura pa bo yiunan sa cu bo tey pa tende nan preocupacion y sentimentonan. Y cu bo no ta spera perfeccion, sino cu nan ta haci nan best.

Fuente: articulo “Back to school” – Kidshealth

Pa informacion of pregunta por acerca Fundacion Pa Nos Muchanan – Cumana 2

Tel: 5834247/5880856 – Whatsapp: 6998900
E-mail: info@fpnm.aw – Website: www.fpnm.aw