Yu di mayornan Antiano…. Muchanan bandoná na Ulanda ta un problema

WILLEMSTAD. Na Ulanda tin un situashon ku ta ‘taboe’ pa papia abiertamente riba dje i esei te kaso di hobennan ku ta problematiko i nan mayornan no por kontrolá i eduká i ta komete delito i ta kai será.

Esei te prome parti dje problema.
E di dos parti ta bini ora e muchanan mester bai kas i ta resultá ku sea mama of tata a bandoná e mama i bin Kòrsou lagando muhé ku yu problemátiko atras.
Organisashonnan sosial tin ku bula aden ora ku otro famia manera wela of tanta no por yuda pasobra e mama dje yu mes tambe ta problematiko.
E siman aki un tribunal na Rotterdam mester a resolvé unda ta hinka dos mucha kurasoleño ku no tabatin mayor kapas pa maneha nan i no a keda otro sino di hinka nan den un internat pa nan no bai hiba un bida di krimen riba kaya.
Pa esei sosode, wes tin ku duna pèrmit i tin varios organisashon grandi na Ulanda ku ta manehá sentronan kaminda e muchanan ta biba protehá for di mundu interior sin ku nan ta serka pasobra nan a kometé delito.
Simplemente no tin famia pa tuma nan.
Jeugdbescherming Rotterdam Rijnmond e siman aki a hasi un apelashon riba korte pa haña pèrmit pa hiba dos hoben kurasoleño internat pasobra nan mayornan no ta den kondishon pa kria nan.
Un di nan tin 17 aña o sea ku e ta adolesente kaba pero si no duné akomodashon, e ta biba riba kaya.

Un dje muchanan ta bibando kaba den e komunidat será ku yama Pluryn Eefde kaminda wes a duna pèrmit pe keda tres luna te ora nan haña un famia ku ta dispuesto pa tum’é den kas.
Pero esei ta te dia 29 di yuni proksimo despues di kual e mester bai pero no por haña lugá pe pasobra hopi internat tabata su pre-historia muchu kompliká.
Tampoko no tin posibilidat pa registré komo miembro di un grupo ku ta haña tratamentu pasobra e no ta mira nesesidat pa esaki.
Tin un instituto ku yama De Koppeling na Amsterdam pero ei tampoko nan no por a tum’é pasobra e ta demasiado karu.
I komo ultimo rekurso nan a sugeri pa manda e hoben Kòrsou numa i mira ken di su famianan na Korsou ta dispuesto di tum’é den kas pero mirando e situashon ekonomiko na Kòrsou, e chèns ei tambe ta skars.
Pero pió lo ta si laga e mucha bai kas na Amsterdam pasobra einan lo no tin algun klase di kontròl riba dje.
E hoben a hañ’é den e situashon aki pasobra e tin dos aña i mei kaba den un internat i e no por keda te dia e bira mayor di edat. E institutonan aki ta pa muchanan menor di edat.
E situashon t’asina desesperá ku nan a buska drechi hasta ken ta famianan dje mama te ku nan a haña un tanta na Amsterdam pero e no ke tin e doló di kabes di kria yu di otro hende.
E problema dje mucha homber ta ku si nan mand’é den un internat habrí, kada bes e ta kore bai i ta disparsé.
Di manera ku e situashon ne momentonan aki ta ku no tin alternativa
Di manera ku wes di korte hubenil a disidi ku mester tené den un internat será te dia 29 di yuni pa haña tempu pa buska solushon.

MAMA KU TATA DI KRIANSA
E otro kaso ta di un hoben di mama ku tata kurasoleño ku despues ku ela kaba di sinta un kastigu kòrtiku mester haña guia den un internat pe no bai pèrdí.
Reclassering a pidi wes pa ordená pa e bai un internat será pa tres luna e ora kaba di surti ki ta hasi kune.
E problema ta ku no por haña e mama ni e tata pasobra e ultimo aki tambe a biaha pa Kòrsou sin laga adrès atras.
Den e kaso aki e wela a kria e mucha homber pero no por sigi mas pasobra e ta birando malu i tin konflikto kada bes ku e mama.
Nan no por keda serka nan mama di kriansa pasobra esei ta konflikto so e ta krea.
Uniko kos ku wes por a hasi ta laga hiba e mucha un internat i tuma tempu pa buska un lugá adekuado pe. I asina tin un largu lista di espera di hobennan kurasoleño ku no tin mayor pa kuida nan mas na Ulanda.