World Health Organization a klasifiká Monkey Pox un emergensia global

VIENNA – Tedros Adhanom Ghebreyesus a dirigí su konferensiá di prensa virtual ayera i a anunsiá ku World Health Organization lo tin ku klasifiká e brote di Monkey Pox komo un emergensia global.
Tin un total di 15.800 kaso registrá na 72 pais riba e planeta aki i ku segun Tedros Adhanom Ghebreyesus ta algu serio.
E kasonan di infekshon di Monkey Pox a kuminsá oumentá for di prinsipio di luna di Mei i pa aworakí
e sifranan ta subiendo drástikamente.
Tedros Adhanom Ghebreyesus a bisa ku ta inevitabel ku e kasonan lo bai sigi oumentá drástikamente den e próksimo lunanan benidero debí ku tin hopi hende ta biaha den avion durante e periodo di aña aki.
E titular di World Health Organization a bisa ku e ta sumamente preokupá kon lihé Monkey Pox ta plamando na nivel global i ku pronto lo tin ku bai tuma medida hopi mas serio pa evitá ku tin hende ta keda hospitalisá i muri.