Wilders a sali na defensa di gezaghebber Rijna di Boneiru

WILLEMSTAD. Mester ta ku e kalor ku ta reina na Ulanda mester a afektá sano wisio di varios politiko ku awor a garando un ‘faux pas’ di Sekretario di Estado van Huffelen pa un opservashon inkorekto ku ela hasi den parlamento ulandes tokante asuntunan na Boneiru.
Wilders kende ta drumi ku wowo habrí durante su trabou den politika parlamentario den Tweede Kamer a bula riba e splikashon ku e mandatario a duna riba e papel di gezaghebbernan den Karibe.
Wilders i su ‘kornuiten’ a lanta eksigi un diskulpa publiko di parti di Van Huffelen pero posiblemente lo e mester warda te dia di Sint Juttemus pa usa un ekspreshon vernákulo ulandes.
E simpatisadornan di Wilders sí ta haña ku Van Huffelen su fayo verbal tin konsekuensia pa gezaghebber Edison Rijna di Boneiru pasobra reportadamente su reputashon di integridat a haña un gòlpi.
Un komentarista ulandes ku ta kome i bebe di notisia di nos islanan ABC i BES a opservá ku mandatarionan ulandes ku tin ku atendé ku ta enkargá ku Relashon den Reino ta eksperto den pone pia pa laga gobernantenan Karibense trompeká.
Ronald Plasterk a pone pia pa Mike Eman i awor Aruba ta horká ku gabinete Wever Croes ku tin buraku den su man,
Raymond Knops tambe a pone pia pa Eugene Rhuggenaath kende apesar di atvertensianan kasi diario e kere den Knops pa pasa man den su krullebol i wak ki a pasé.
Kòrsou a haña un promé minister krioyo i vernákulo kende asina e tende un avion bula pasa, ya e t’aden kaba. Loke sí e ta bon den dje ta pa regla pastechi pa su amigu i famianan (nos no konosé ni un di nan: red).
Pero e falsedat politiko den nos historia parlamentario ta loke nan ta yama ‘Verraad van Gijs de Vries’ kende a laga difuntu Miguel Pourier baila Polka i pa elogio ku sierto gremio di votadó tabatin pe, e tambe a pèrdè e bataya.
I awor ta Sekretario di Estado Alexandra van Huffelen ku a pone kaska di bakoba pa Edison Rijna i a lubidá tur e momentonan agradabel di ‘buen comer y tomar’ ku nan a pasa na Boneiru kaminda Edison Rijna tabata e anfitrion perfekto.
I pa straño ku ta parse ta e mesun influensiador i komentarista ulandes a sali na defensa di Rijna.
I tur e were-were pa un kos ku ta pará pretu riba blanku den lei: si gezaghebber mag vota riba of laga riba temanan di balor prepoderante.
I lei a bisa ku e mester vota, no si e mag of tin gana sino e mester.

DISKULPA
PUBLIKO
Geert Wilders komo ‘animal politiko’ a haña su chèns pa vlam un miembro di e gabinete Rutte i a organisa un skandal digno di un kousa mas husto.
Wilders i De Graaf ke sa awor formalmente si e sa lesa ulandes……. i rektifika e daño ku nan a hasi na e persona di Reina…….