Widney Martha: Nos sistema di “Impuesto” i “ekonomia” ta traha pa nos faya

WILLEMSTAD – Komo un komersiante di basta aña i studia den e disiplina di negoshi, Widney Martha di e organisashon “Life Changers” ta puntra, si ta mas mihó pa traha pa hende òf tin bo mes negoshi.
Widney Martha a bin na e konklushon si bo ke hasi negoshi limpi na Kòrsou ta hopi difísil pa bo logra. Segun estudio nan hasi, 8 di 10 negoshi ku lanta na Kòrsou ta sera entre 1 i 5 aña. Esaki ta algu hopi doloroso i ta nifiká ku tin algu ta sosodé ku ta pone ku e negoshinan no por sobreviví.
Segun Sr. Martha, nos sistema di impuesto ta forma un gran parti di e problema aki. Anto a yega tempu pa nos por atendé ku esaki, mas lihé posibel. Mi ta komprondé ku e pais ta den problema òf a wòrdu hinka den problema, pero e pueblo no por yuda gobièrnu mas den e forma diskriminatorio ku ta hèndel ku impuesto.
Ora bo pensa ku e hende ku ke hasi negoshi limpi ta haña un alivio pa nan tambe por bai dilanti, kada bes nan ta wòrdu kastigá pa nan faya. I un grupo ku no tin kunes si hasi bon, ni kos ilegal, ta bai dilanti.
Komo kreyente mi ta yuda hopi negoshi chikí pa bai dilanti. Tin di nan bèrdat tin problema ku maneho. Pero ora bo yuda nan pa struktura i hasi kosnan korekto e sistema ta skupi nan afó. Gobièrnu mester krea un ambiente pa un negoshi por funshoná mas mihó. I esaki ta yuda ku e hende tin mas i asina e por gasta mas den e ekonomia. Ta hopi fásil pa gobièrnu sinta i kobra impuesto, sin bin ku nan mes idea pa haña sèn èkstra, ku no ta djis dor di impuesto di e pueblo.
E bèrdat ta mi no ta sinta den e stul Sr. Widney Martha di “life Changers” ta sigui bisa, pero ta p’esei e pregunta, kon nos por yega na otro pa nos por baha e sifranan di frakaso di negoshi i ku komersiante nan ku kier hasi kosnan korekto, tambe ta bai dilanti.
Nos di “Life Changers” a manda kartanan na minister Presidènt i ministernan konserní di ekonomia, finansiá i soaw pa asina por wak unda e sapatu ta pèrta, pa asina nos por yega na otro. Nos ta spera riba nos invitashon pa nos por trese nos doló i plan dilanti.
Si e pueblo ta bon, e gobièrnu tambe ta bon.