WES MR. J. SNITKER A EKSIGUI MAS INVESTIGASHON DEN E KASO DI ULRICH SCHERMER “PAPY”

WILLEMSTAD – Investigashon masha mal hasí di parti di polis i reshèrshi a pone ku wes mr. J. Snitker a disidí ku mester hasi mas investigashon, komo tal e kaso no por a yega na un konklushon final ayera. Loke a subi mesa ayera pa loke ta resultadonan di e investigashon ta totalmente fo’i òrdu i abogado enkargá ku e defensa señor mr. Eldon “Peppie” Sulvaran klaramente tabata fiesta ku e opservashonnan suak i ménos supstansiá di parti di Ministerio Públiko. Fiskal señora mr. S. Ter Borg no tabata sa kua banda e mester kue i kada biaha mester a dobla den tur sorto di bògt, reakshonando sin konvikshon riba e opservashonnan skèrpi i detayá di abogado mr. Eldon ‘Peppie’ Sulvaran.

Kiko ta e kaso? E siudadano Ulrich Schermer, bibá den e bario Brievengat a keda akusá di a tira dia 25 di yüni 2022 ku un arma di kandela riba J. Martina i herid’é. E suseso aki ta un sorto di revancha, pasobra J. Martina a maltratá un subrino di Ulrich Schermer, kual subrino tin apénas 14 aña di edat. E víktima di e tiroteo J. Martina, kende ta un hòmber di 25 aña di edat a dal un mucha di 14 aña i a bis’é bai yama ken ku bo ke. Na sierto momento a start un tiroteo i asina ei mester konkluí ku a tira dirigí riba J. Martina, kende a risibí bala i a kai abou na suela. Nan ta bisa ku ta Ulrich Schermer a tira J. Martina, pero Ulrich Schermer a bisa ku e tabata den kas na momento ku balanan tabata zona eifó.

Den sala di korte ayera Ulrich Schermer a para ariba ku e tin 3 luna inosentemente será. Ulrich Schermer te asina leu a keda akusá di sea intento di asesinato, intento di maltrato pisá i poseshon di arma di kandela. Ulrich Schermer a sigui bisa ku e sa mete únikamente ku asuntu di edukashon i kuido di su yunan i ku aktualmente su muchanan ta keda perhudiká, pasobra e ta será, anto pa kolmo pronto su kasá mester bai hospital. Mas aleu, segun Ulrich Schermer, e no tabata sa mes ku J. Martina tabatin problema ku su subrino. Ta despues el a tende. Den e deklarashonnan ku a bini padilanti di parti di Ministerio Públiko, fiskal señora mr. S. Ter Borg a hasi komo si fuera hinter bario di Brievengat tin miedu di duna deklarashon kontra di Ulrich Schermer, pasobra e ta un hende peligroso ku tin arma di kandela i ta mete ku droga. Un señora (bisiña) a duna deklarashon ku el a mira hende tira J. Martina, pero e no a bisa ku el a rekonosé Ulrich Schermer komo esun ku a tira. E siudadano J. Martina mes, kende ta e víktima, tampoko no a bisa mesora ku ta Ulrich Schermer, kariñosamente yamá Papy a tir’é. Ta ora ku a lag’é mira pòtrèt di Ulrich Schermer el a bisa ku ta e persona ei a tir’é. Enfin, un kaso masha straño i bruá mes ku kasi no ta basá riba akusashonnan verídiko.

E akusado Ulrich Schermer a deklará ku el a keda masha straño di tende ku polisnan tabata busk’é pa e asuntu aki, pero en todo kaso el a bai warda di polis dia 6 di yüli pa entregá su mes. Fiskal mr. S. Ter Borg na sierto momento a puntra e akusado Ulrich Schermer si el a skonde su kurpa pa polis, pero Schermer a rechasá redondamente, bisando ku e tabata masha normal na kas. Tratamentu di e kaso ayera a dura bastante largu, ku hopi bai bin na palabra, pero ku kada biaha tabata krea mas insertidumbre. Tabatin krítika tambe ku e verbal tabata skibí ku man i hopi kon ku ta, anto no tabata prosesá na drechi. Un siudadano tin ku a keda di firma e verbal, pero ku despues a ninga. Tambe e hecho ku polisnan a haña 2 arma di kandela di kos di hunga den e kas di Schermer, no ta ningun prueba, pasobra tabata kosnan di hunga di su yunan, segun e akusado Schermer. Wes a haña ku tin prueba ku a tira, ata J. Martina heridá i ku esaki ta probá dor di dòkter. E akusado Schermer tin un pasado ku hustisia, pasobra na aña 2007 i 2011 el a falta ku e lei di droga.

Finalmente fiskal a demandá un kastigu di 26 luna di kua 12 luna kondishonal i un periodo di prueba di 3 aña. Wes mr. J. Snitker a haña ku e kaso aki mester bini pa tratamentu un biaha den sala di korte dia 28 di desèmber binidero i ku entre tantu mester hasi mas investigashon den e bario, wes komisario mester skucha e señora bisiña, ku a fungi komo testigu. E opservashon ku bisiñanan tin miedu di duna deklarashon kontra di Schermer no ta ningun argumento akseptabel segun wes.