Wes máksimo di outoridat elektoral a klap partido di Bolsonaro but di $4.3 mion

SAO PAOLO – Jair Bolsonaro su partido a pidi TSE (Tribunal Superior Electoral ) na Brazil pa invalidá elekshon presidensial 2022.
Carlos Rocha presidente di Partido Liberal (PL) a insinuá ku nan lider Jair Bolsonaro ku tabata kandidato presidensial tin prueba ku e konteo di TSE ta froudulento.
Wes Alexandre de Moraes di Tribunal Superior Electoral a rechasá e solisitut di e partido di Jair Bolsonaro i a señalá ku e kondukta di e aktual presidente di Brazil tabata di mala fe pa difamá e institushon.
Jair Bolsonaro a trata na imitá presidente Donald Trump pero den e kaso aki Wes Alexandre de Moraes di Tribunal Superior Electoral a klape ku un but sera di 22.9 mion Real ku ta ekivalente na $4.3 mion.
Na mes momentu partido di Luiz Inacio Lula da Silva a entrega un keho kontra gobiernu di Jai Bolsonaro ku a stroba míles di simpatisadónan di PT Partido de los Trabajadores bai vota. Wes Alexandre de Moraes a splika ku nan lo bai investigá e kaso aki ya ku nan tambe a haña prueba ku tabatin militarnan tabata detené shofùrnan di busnan yena ku simpatisantenan ku mester a bai vota den último elekshon presidensial na Brazil.