Wes a rechasá petishon´di yu/curator pa interná su mama den Birgen di Rosario

WILLEMSTAD. Wes di Korte den Promé Instansia a rechasá petishon di un señora siudadano ku ta traha na gobiernu pa interná su mama den un Kas di Ansiano pasobra e mama ta perdiendo kontrol riba su fakultat mental pero e señora no ke sali for di su kas.
E yu a regla kaba kende lo bira e persona Curator ku lo kuida pa bienestar material i spiritual dje mama kende ta un persona di 69 aña.
Prome ku wes a start e proseso, e mes a papia na telefòn ku e sikiatro ku ta trata e mama mientras ku e señora a asisti ne kaso di korte huntu ku e persona ku ta su aktual curator ku ta su mes yu ku tambe tabata presente ne kombersashon ku wes.
E persona ku aktualmente ta responsabel i ta tuma tur desishon pe mama te yu ku korte a nombra aña pasá.
Durante e seshon, e señora a bisa kategorikamente ku su deseo ta pe keda biba den su kas i e yu ta atmiti ku esei ta posibel pasobra e mama tin moda finansiero pa paga gastunan di su kuido personal na kas.
Ademas ta tarea dje yu komo curator pa e mama biba mas tantu posibel den su kas.

DI KAS PA
FUNDASHON
E yu a pidi wes pa duna e pèrmit nesesario pa hiba e señora mama Fundashon Birgen di Rosario ya ku e tin e moda finansiero pa paga pa nan kuidé den un kas di ansiano i paga pa tur su kosnan.
E yu a hasi e petishon pasobra e situashon di kuido na kas a sali for di man di tal forma ku e no por manehá e situashon su so.
E yu ta traha, e kuido ta afektá su trabou i su bida sosial i funshonamentu na trabou a bai atras.
E yu a bin ku deklarashon di sikiatro F.H. plùs nomber di dos kolega di trabou na gobiernu i dos representante di Spiritual Healing Centrum.

YU MES POR
DISIDI
Wes a señalá ku e yu komo Curator mes por disidi unda e mama ta keda.
Pero e petishon ku ela hasi ta bai mas leu ku esei, esta pa hinka e señora permanente den un Kas di Kuido kaminda ademas nan por kuidé pa su enfermedat.
Pa esei nan mester firma un kontrat di tratamentu mediko ku Fundashon Birgen di Rosario pe haña tratamentu bou di tur sirkunstansia ku tur ekipo nesesario.

KAMBIO DI
OPINION
Aña pasá tambe wes a papia ku e señora i su yu i ela bisa kategorikamente ku e no ke bai un kas di hende grandi.
Resientemente e no tabatin sigur mas ku si e ke keda kas of bai kas di hende grandi.
Pere esei ta logiko pasobra mentalmente ela bai mashá atras.
Na Ulanda t’asina ku e curator tin poder pa ordená pe señora bai e kas di hende grandi, aki no tin e lei ku ta duné e poder ei.
E señora no ta sufri ningun menasa of desbentaha fisiko i e eventual puntonan negativo ta toka e curator mes.
Pero nan no sa e motibu pa hiba e señora un Kas di Hende Grandi.