Wes a ordená empresa pa tuma empleado ku 33 aña di servisio na trabou bèk

WILLEMSTAD. Un empresa lokal ku ta bende bebida alkolholiko a haña un veredikto manera un klòk di misa den kaso di retiro ku un kompania lokal nan a duna un trahadó ku 33 aña di servisio pasobra supuestamente ela bai kas ku dos bòter di bebida alkoholiko.
E kaso ta un ehempel klásiko di kon hende sa abusá di trahadó ku ta lomba kontra muraya i aparentemente indefenso pero afortunadamente Kòrsou tin lei ku no ta pèrmiti pa abusá di hende deskaradamente manera a sosode den e kaso aki.
Pa kolmo e trahadó no a bai kas ku dos bòter di bibida alkoholiko sino ku ta un kolega a pone e dos bòternan den e vèn di trabou i ora un trahadó di Van der Tweel a mira e homber ta bai, a yama bisa ku ela bai ku dos bòter ku a sobra di un ekshibishon i ela hiba nan bèk inmediatamente.
No ku su siguiente di e gerente dje empresa di likor a traha un trampa pe i poné asina pisá bou di preshon ku ela hasta firma su karta di retiro boluntariamente…..
Esei siendo ku e empresa a kometé un litania di abusu laboral kontra dje trahadó i tabatin un tonelada di abusu ku nan a hasi ku e homber kende foi tempu ku ela kuminsa traha ne kompania nunka a bai ku fakansi!!!!!!
Dia e kaso a bin dilanti abogado dje kompania a bin ku un seri di argumento poko profeshonal ku wes a rechasá kasi tur su demandanan i a ordena e empresa pa nan paga tur e primanan di penshun ku nan a retené pero no a paga GUARDIAN!!
E kaso ta lo siguiente: e trahadó tin 33 aña di servisio ku un salario di NAf 2.383,60 bruto pa luna (esei ku overtime den dje) i esei na un likoreria ku ta fabrika di traha plaka. E tabatin derecho riba su dianan di fakansi, i dertiende maand bonus.
Tur luna tabata retené su prima di penshun pero 9 aña i mei largu e kompania no a manda e plaka pa Guardian.
Aña pasá 22 yuni 2021 e trahadó huntu ku un kolega e bai desmantelá un showcase na Van den Tweel. Nan a hinka e bòternan di alkohòl ku tabatin den e showcase den dos kaha i a entrega un kaha yen na bali di Van den Tweel. Un otro kaha ku dos bòter di alkohol ku a sobra nan a pone den e outo di kompania ku e trahado tabata kore.
Trahadonan di Van den Tweel a mèldu nan doño di trabou ku e homber a bai ku dos bòter di bebida riba kual a yama e trahado pa hiba e bòternan magazijn i un otro hende a hiba nan Van den Tweel bèk.

RETIRO NA LUGA DI BONUS
Seis dia despues e gerente dje kompania di likor a manda un mensahe pe trahadó bisé pe bin ofisina atardi 6’or pa diskuti algu kune i ela kontesta: “Kiko un bonus boso tin pa mi di tur e dia nan ku mi a traha te lat?”
Den ofisina nan a duné dos dokumento pa e firma ku e ta tuma su retiro pero ela ninga di firma.
Tres dia despues nan a bolbe yam’é na ofisina i a duné 15 minut pa firma su sentensia i despues di a papia ku un hende na telefon ela firma e karta ofresiendo su retiro.
Esei lo a nifika final di su empleo di 33 aña den servisio di Handelmaatschappij de Driehoek N.V. i kaminda lo a pagé 4 luna di salario pero e no tin derecho riba nada mas!!
E empleado a bai kas i a laga su abogado manda un karta pa Driehoek kaminda e ta bai di akuerdo ku su retiro a kambio di pago di NAf 180.261,88.
E reakshon di wes tabata kasi kasi violento pasobra e kompania a akusé di robo serka un kliente i e doño a poné preshon emoshonal i a manipulá teriblemente pe firma e karta i retiro.
I komo insulto riba e daño material, a bisé ku aki tres pa kuater luna e por retorna i nan lo wak kiko lo tin pa hasi pe.
Wes a vlam a kompania mustrando ku nan a faya ku nan deber komo bon doño di trabou.
Su ultimo salario kontando overtaim struktural den dje tabata NAf 3.746,94 pa luna pa motibu di hopi trabou NUNKA e no por a tuma fakansi.
Anto e abusu mayor ta kaminda e kompania a retené si plaka di fakansi i bonus durante tres aña inhustamente ku gastunan di telefon di kompania sin nunka duné un spesifikashon.
I si e no firma ku e ta asepta tur kondishon nan a deskontá esaki for di e prima di penshun ku nan a retene sin paga FATUM.
Anto komo insulto adishonal e kompania a bisa ku nan tabata asina royal di duné 4 luna di salario i keda sin kobré e gastunan di telefon ku ela hasi pe propio kompania.
I aki e kompania a bira ‘michi’ ku a pidi pa tene konsiderashon ku loke nan mester paga e trahado.

NI UN KARTA DI REKOMENDASHON E NO TA HAÑA.
Pero loke wes a tuma e kompania masha na malu ta kon engañoso i manipulativo nan a atende ku e trahado gañando ku despues di algun luna e por bini bèk pa traha. Traha kiko ken sa, bari ofisina?

VEREDIKTO SIN PORDON

Wes no a gasta palabra na su desishon.
Denter di 10 dia despues dje veredikto mester tumé bèk den servisio.
Terminá e akuerdo laboral ta ‘out of the question’
E kompania mester sigi paga su salario te terminá esaki legalmente.
E kompania mester paga e trahadó NAf 29.722,44 na prima di penshun bèk.
Pa loke ta e gastunan di telefon a rason di NAf 36.681,59. e trahadó a kere ku e tabata hasi uso dje bundel Chippieland i nunka nan a bisé otro. Di manera ku no por kita e plaka aki for di dje.
Di manera ku e veredikto a demostrá ku lei ta hustu i ta konta igual pa tur hende, trahadó of doño di trabou.