Wes a duna dos ruman ordu pa sali for di kas ku nan a heredá di nan mayornan

WILLEMSTAD, Resientemente wes den kaso di promé instansia a ordená dos ruman ku a biba den kas di nan mayornan difuntu pa bandoná e kas sino e ta laga deurwaarder ku polis pone nan porta afó.
Despues di un matrimonio di 23 aña den union di propiedat e pareha a fayese 4 aña pasá sin traha testament.
Tur e tres rumannan a aseptá e kas komo herensia.
Riba repartishon di bienes e pareha tabatin diferensia di opinion pero nan a resolvé e diferensianan durante dos prosedura.
E akuerdo ta bisa ku e yunan lo enkargá Makelaar Joubert pa balotá e kas i ku lo deskonta e gastunan, ta parti resto dje balor i ta kita e suma NAf 32.500 pe homber.
Dia Makelaarskantoor Joubert a balotá e kas djafó so pasobra e no por a drenta e kas.
Dos ruman a kuminsa un kaso kontra e ruman ku ta tene pia steif pakaba di resolve e herensia pero e ruman ku nan a demandá no a presentá.
Wes a tuma e kaso den su man i a ordena e ruman ku ta dwars pa duna su koperashon i firma e aktanan normal pa por ehekutá e venta.
Den kaso dje ruman ku ta komportá dwars of no ta yuda deurwaarder S.C.M. Ersilia wes a duna esaki poder pa tuma tur paso pa ehekutá loke wes a dikta.
Aña pasá deurwaarder Ersilia a bai tira bista riba e situashon pero no por a drenta pasobra no tabatin ningun hende presente.
Dj’aya banda tin un kandidato kumpradó pero pe por haña hipoteka ke mira foto di interior dje kas.
E dos rumannan ku ta interesa pa bende e kas a pidi wes pa duna e ruman dwars pa denter di juni tèrmino ku e fiha pa bandoná e kas liber di tur koroto. I si akaso esei no sosode, wes a apoderá Ersilia pa saka e ruman for dje kas ku tur su kosnan. I si asina mes e no bai notario pa firma por usa firma dje wes pa saka e homber for di kas.
No ta promé biaha ku korte a ordená e homber pa sali for di e kas pero e no a hasi kaso.
E kas ta degenerando pero e ruman no ke koperá pa bende e kas.
Na final wes a disidi ku kuater siman ta sufisiente pe ruman bandoná e kas bashí.
Den e asuntu aki kada ruman a paga parti dje gastunan pasobra konsiderando e relashon familiar venenoso, e mesun wega ta sigi.