Vernon Chatlein ta presentá su ‘IMERSHÓN’ ku un toke íntimo

Willemstad – Dianan 23, 24, 25 i 29 di yüli awor, e talentoso hóben músiko kurasoeño Vernon Chatlein lo presentá 5 konsierto íntimo den e proyekto titulá ‘Voices From Letters: IMERSHÓN’ kual ta un produkto di Voices From Letters: Zikinzá.
Zikinzá ta un patrimonio basá riba e kolekshón úniko di 1400 kansión, músika i historia ku Pader Brenneker i Elis Juliana a kompilá den dékada di 1950, riba nan mes forsa i ku gran dedikashón.
Na 1975 a transferí e kolekshón pa Fundashon Zikinzá, ku despues a alok’e den Archivo Históriko Sentral.
Ku ‘Voices From Letters: IMERSHÓN’, Vernon Chatlein ta duna un homenage na nos antepasadonan (Kòrsou) i nos herensia kultural, den un konsierto musikal bibu i íntimo, ku ta sumergé e oudiensia den e müzik, kultura i historia di Kòrsou. Vernon a hinka e produkshon den otro ku su propio komposishonnan. Ademas e ta uza tambe grabashonnan orginal for di e kolekshon di Zikinzá.

Ya for di 2018, Vernon a start ku e proyekto i a presentá esaki den varios teatro rònt Ulanda durante 2019. Na mei 2020 tabata e intenshon pa presentá e bunita obra na e públiko di Kòrsou, pero debí na Covid-19 mester a posponé esaki, i por fin por realis’e na luna di yüli awor. Durante e periodo ku a pasa Vernon a sigui desaroyá e proyekto mas den profundidat i dianan 23, 24, 25, i 29 di yüli awor Kòrsou lo disfrutá di un bunita obra musikal kultural di kalidat haltu.

Debí na e kantidat limitá di públiko ku por aseptá den e lugarnan di presentashon, segun protokòlnan den kuadro di Covid-19, a repartí e proyekto den 5 presentashon na 4 sitio diferente. Kada sitio skohí ta relatá ku e tema i spiritu di e obra.
Djabièrnè 23 di yüli pa 19:00 na Teatro Luna Blou, djasabra 24 pa 18:00 i 20:00 na Landhuis Bloemhof, djadumingu 25 pa 16:00 na Museo Kas di Pal’í Maishi i finalmente djaweps 29 di yüli pa 18:00 na Gallery Alma Blou.
Entrada pa presentashonnan ta kosta NAf 35,= i ta optenibel na Mensing’s Caminada òf por reservá tambe via telefòn 510 2863.
Por bishitá i ‘like’ e pagina artístiko riba Facebook di Vernon Chatlein, https://www.facebook.com/vcelements
Ademas por haña mas informashon di e talentoso artista YdK riba su wèpsait, vernonchatlein.com