VBC ta boga pa eliminá plachi di dia

WILLEMSTAD. Salubridat públiko ta súmamente importante pa nos tur, punto!
Ta p’esei tambe VBC, ku ta e Asosiashon di Industria i Komèrsio di Kòrsou a duna tur sosten na e medidanan di “lockdown” ku Gobièrnu a implementá 6 siman pasá.

E sífranan di Covid di 6 siman pasá tabata hustifiká e desishon ei di Gobièrnu.
VBC a sostené e desishonnan ei, apesar ku esakinan lo a bai kousa hopi daño na ekonomia di Kòrsou i propio miembronan di VBC, pasobra varios di nan lo no a generá niun depchi mas na entrada.
Awor aki nos ta 6 siman den lockdown i ketu bai tin e asina yamá “plachi di dia” i varios otro medida ku ta pone ku negoshinan ta sangrando.
Hopi negoshi a sera nan porta kaba a konsekuensia di e pandemia i gran mayoria ku ainda ta na bida, ta den “survival mode”.
Mirando kon e sífranan di Covid a baha kompará ku 6 siman pasá, VBC ta konvensí ku mester por kita e plachi di dia, p’asina negoshinan por kuminsá hala rosea bèk i haña un bida.

Hopi hende ku awor aki ketu bai ta na kas, tambe por kuminsa bai traha bèk e ora ei.