Deporte
Vários amigu i eks deportista a selebrá ku e eks estrea: “Amigunan di kolebra bèrdè” a rekonosé Glenn… I selebrá kuné…
E eks estrea di futbòl Glenn Kwidama ayera a selebrá 60 aña di bida. Glenn ku ta biba na Ulanda a bini Kòrsou ku fakansi, i ayera tardi na sentro di bario Wishi Marchena “Amigunan di Kolebra Bèrdè” a selebrá i rekonosé Glenn Kwidama komo gran futbolista, lider i amigu.
Glenn ta un figura hopi popular ku semper apesar di fama a keda humilde, i semper den kontakto ku su amigunan aki na Kòrsou.
Glenn a train masha hopi mucha di bario, i semper demostrá un amor pa su hendenan ounke na Ulanda.
Kwidama a hunga futbòl aki na Kòrsou den Sithoc, den selekshon, i tabata futbolista profeshonal na Uruguay ku e tim di Nacional i na Rotterdam ku Feyenoord. Un kantidat di eks deportista, amigu i famia a selebrá 60 aña di Glenn, i dun’é rekonosé komo un lider i gran amigu.
Sin duda un atardi hopi ameno danki na “Amigunan di Kolebra Bèrdè” pa e invitashon.