“Uza bo curason pa conecta” Stima bo curazon

ORANJESTAD-Sigur un of mas biaha bo a stima di curazon. Stimacion ta un sentimento basico, bunita y e ta laga bo sinti completo y feliz! Mescos cu bo ta stima di curazon, bo curazon tambe mester di bo stimacion y cuido. Bo ta cuida bo curazon suficiente? Kico bo ta haci pa cuid’e y proteh’e? Bo a yega di para keto y pensa esey?

Dia 29 di september, Dia Mundial di Curazon, ta un bon oportunidad pa para keto un rato y pensa kico (mas) bo por haci pa proteha y cuida bo curazon. Tin diferente actividad den bo bida diario cu bo por haci pa cuida bo curazon. Kisas tin factor cu bo no tin den bo man manera por ehempel herencia familiar y edad, pero di otro banda tin hopi factor cu si bo tin den bo man manera bo sistema di come y biba.

Con bo por yuda cuida bo curazon:

Come alimento saludabel. Come suficiente fibra. Fibra ta yuda controla e nivel di triglyceride y colesterol den sanger. Bo ta haya fibra den productonan integral manera pan volkoren, pasta y cereal integral (bruin), fruta y berdura. Disfruta por lo menos 2 biaha pa siman di pisca.

Pisca ta contene Omega 3 cu ta yuda proteha e adernan. Evita vet satura cu por conduci na seramento di ader. Vet satura bo ta hay’e den cuminda hopi procesa, manteca, carni cora y keshi.

Haci tur dia suficiente actividad fisico. Haciendo movecion ta yuda tene e nivel di colesterol, triglyceride, sucu y presion stabil. Corda haci por lo menos 30 minuut di actividad pa dia, of 3 biaha pa siman 60 minuut.

Siña maneha stress. Stress continuo ta hisa e presion di sanger y esaki ta afecta entre otro bo adernan (di curazon).

Evita humamento y limita alcohol.  Tabaco ta hisa e presion, colesterol y triglyceride den sanger. Alcohol ta pone bo curazon bati mas liher. Factornan cu ta malo p’e salud di bo curazon.

Controla bo peso. Peso di mas ta afecta henter bo sistema. E tin efecto riba bo presion, sucu, triglyceride y colesterol. Tur ta factornan cu ta promove malesanan di curazon. Ta un bon momento pa cuminsa cuida bo curazon, uza bo curazon pa proteha bo curazon.

IBiSA, DVG, AZV, SVB, WGK, HOH y FADA cu hunto ta forma Plataforma di Promocion di Salud, ta invita bo pa cuminsa practica algun, of mihor, tur e puntonan aki’riba menciona pa proteha y cuida bo curazon.

Uza bo curazon pa haci escohencianan saludabel!