UN YAMADA NA TUR PARTIDO POLÍTIKO DEN KONTIENDA

Resultadonan di e elekshonnan pa Parlamento na luna di mart binidero ta un di esnan mas krusial den historia di Kòrsou. Dikon? Ta nesesario pa gobernantenan di Kòrsou hasi tur esfuerso pa trese rekuperashon den nos sistema sosial ekonómiko influensiá pa e konsekuensianan teribel ku e krísis di Covid 19 a krea i ku tabata kompañá pa un enorme desempleo, pasobra vários empresa a sera, ku na su turno a limitá siudadanonan i kasnan di famia na entrada.Un otro faktor di sumo importansia ta sinta den e hecho ku formando parti di reino ulandes, Kòrsou bou di e sirkunstansia ku a presentá a sera palabrashon i kombenionan ku mester keda evaluá debidamente i mira si tin espasio ainda pa revisá nan di manera ku por krea kondishonnan ku mas ta benefisiá nos isla. E sirkunstansia di refineria Isla i Bullenbaai porfin mester keda konbertí den posibilidatnan pa kresementu real di nos ekonomia.