Un siman pa lubidá ku forsa retroaktivo

OHALÁ KU E SUSESONAN ku a sosodé e siman aki den seno di gobernashon i den kampo politiko no ta preludio di un periodo di intrankilidat promé ku e periodo di fin di aña.
Un di e susesonan ku lo yena kualke hende sensato ku tristesa ta e komedia ku a tuma lugá den parlamento di Kòrsou kaminda un biaha mas a sali na kla ku di boka pafó e partidonan di koalishon ke laga parse ku tin e deseo di traha huntu na bienestar di Korsou pero tras di kortina tin mas gana di kòrta di stul di nan propio kolega di koalishon.
Kousa di esaki ta e aktuashon amateuristiko dje minister di Salubridat ku pa di tantu biaha den e par di luna ku e ta den e puesto, a perkurá pa un mini-revolushon politiko ku desishonnan deskabeyá ku ela tuma. E asuntu dje karta ku ela manda pa e dos likidadónan di BZV ta un ehempel olimpiko di torpesa monumental dje minister di MFK ku basta dia kaba ta lagando un marka zig-zag i flip-flop den guia di nos pais.
Tin hende ku lo tin pena pa bisa ku Pic Pisas no tabata direktamente e personahe mas kompetente i kapas pa dirigi gobernashon di nos pais.
Pero te ningun hende den su partido no ta realisá esei i sera kabes pa duné guia i apoyo pa hasi e trabou na drechi na lugá di ta kana show manera modelo na tur evento sosial komo sifuera esei ta su tarea prinsipal.
E kolmo nos ta haña ku e siman aki a anunsia ku e flamante minister di Ekonomia ya kaba ta preparando pa biaha pa Ginebra pa bai un konferensia mundial riba komersio siendo ku Kòrsou mester konsentrá riba komersio ku paisnan bisiña.
For di sobrá pais ta importá so nos ta importá produkto i hasta serbes nos ta bai importá for di Surnam. I ki nos tin pa eksportá pa Surnam?
Si t’asina mes, ainda por
Riba e reunion di parlamento e siman aki nos lo sinta mira kiko lo ta kontinuashon pasobra e tabata un komedia Dantesko di asina mal kalidat ku te ainda nos tin doló di kabes di a sinta tende tantu infantilidat foi boka di hende grandi….