Un paseo na San Willebrordus

Skibi pa Anthony Haile

Kòrsou tin hopi parti bunita ku no tur biaha nos ku ta biba aki riba ta realista esaki. Hopi biaha e mihó manera pa deskribí e sekretonan di Kòrsou ta ora bo hasi kaminata den naturalesa di nos isla. Ta pa e motibu ei, entrante di awor mi ta bai purba dokumentá tur e kaminata nan ku nos ta hasi i kompartí esaki ku boso traves di un relato. Asina aki e ta dokumentá i tambe nos pueblo ta haña sa i realista e kosnan ku nos isla ta ofresé.

Awe mi ta relatá un kaminata ku nos a hasi dos siman pasa na San Willebrordus. Relashoná ku 25 aña di eksistensia di Fun Walk e organisashon aki a hasi un kaminata priva na San Willebrordus bou di guia di Sr. Recheandel Wawoe.

Nos a kuminsá dilanti di Williwood, despues di sigui pa Misa di Willebrordus usando e kaminda patras, kontinuá ku un bishita na Tool van Uytrecht, pa despues drenta mondi pasa  lanthùis Rif Marie, sigui kaminda un desaroyadó  kier bai konstruí diferente kas, sigui kana henter e ruta pa sali na Jan Kok kaminda nos a hasi un bishita na e museo di difunto Nena Sanchez. Despues di esaki nos a regresá Williwood pa disfrutá di  un dushi lùnch i terminá e dia.

Misa di San Willebrordus

Pa nos yega misa di San Willebrordus nos ta pasa den algun kaya patras di misa. Aki bo ta mira diferente kasnan ku diseño úniko i tambe diferente palu di shimaruku. Diferente partisipante ta probechá yena nan tas ku e fruta aki. Ora nos a yega misa, Reacheandal ta splika nos ku e misa aki a wòrdu inougurá na 1888 i ku e pastor ku tabata instrumental den konstrukshon di e misa aki tabata pastor Vincent Jansen. E a hasi promoshon na Hulanda ku e slogan : “ Een kwartje voor de pieten op Curacao”. E a logra rekoudá  basta plaka ku e slogan aki,  ku por a konstruí e misa den estilo Gótiko.  E slogan aki sigur tabata unu ku awe dia sigur lo a wòrdu konsiderá hopi rasista pero ya e a yuda rekoudá hopi sèn.

E misa aki ta un presiosidat i di aleu bo ta mira  kon  imponente  e  ta. Ta bon pa pone aserka ku Pastor Vincen Jansen ta dera den e misa despues ku nan a trese su restunan di Santo Domingo. E tabata biaha pa Hulanda riba un barku i a fayesé i a hib’e Santo Domingo pa entiero. Despues a trese su restunan Kòrsou i a dera den e misa komo gratitut pa tur lokual e a hasi pa Misa di San Willebrordus.  Ta bisto si ku e misa mester di mantenshon urgente ya ku e diferente muraya ta den un estado malisimo.

Bishita serka Tool van Uytrecht

Despues di misa nos ta sigui pa kas di sra. Tool van Uytrecht pa algu di freska. Shon Tool manera e sra aki ta wòrdu yama kariñosamente a risibí nos ku man abri i aparte di te, kòfi i yerba nos a haña un sokulento sòpi di galiña huntu ku su pan sera. Shon Tool ta un hende masha alegre i gusta kompartí ku hende. E ta hopi stima na Willebrordus i no ta straño ku tin un kaya yama na su persona, kual kaya dia 7 di Novèmber awor lo wòrdu inougurá ofisialmente. E fecha ta kai pareu ku fiesta di misa di San Willebrordus.

Lanthùis Rif Mari

Shon Tool a malkriá nos na su kas i despues di esaki nos a sigui ku e kaminata i a pasa dilanti di lanthùis Rif Mari. E lugá aki ta den dekandesha kompletu i Shon Tool ku tambe a disidí di kana ku nos ta splika ku doño nan di e lanthùis den pasado a disidí di kita e dak di e lanthùis pa asina nan no paga belasting. Tambe Shon Tool a bai ku nos den e lanthùis i akinan e a splika kon den pasado e edifisio tabata funshoná. E por a splika esei ya ku dia e tabata mucha masha hopi biaha tabata bishita e lanthùis aki i tabata yuda e doñonan hasi hopi kos den e kas.  Ta duele ku e kas ta den e estado ku e ta ya ku e edifisio aki por ta un joya di un lanthùis si e wòrdu restourá.

Rif Sint Marie

Na kaminda di Rif Sint Marie nos ta mira atrobe diferente palu di shimaruku karga ku fruta. Tur hende ku stima e fruta aki ta sigui yena nan tas. Ora nos sali lanthùis Rif Marie nos ta sigui kana i ta yega na un sitio hopi great ku algun banki ku por sinta ariba. Dilanti di nos tin e awa salu di laman ku ta bini for di laman grandi drentando den un boka. Den pasado e lugá aki tabata wòrdu usa pa saka salu. Komo e awa a drenta hopi aden e a tapa e “zoutpannen” ku tabata tin . Akinan e katibunan tabata produsí salu i nos tin entendí ku tur luna kasi 12 mil saku di salu tabata bai Hulanda. Trahando ku salu den solo kayente ta hopi peligroso i esei tabata pone ku diferente katibu tabata bira siegu.

Na e sitio kaminda nos tabata para ku tur e bankinan bunita ta e intenshon pa un desaroyadó bin traha diferente kas riba e tereno. Ta di spera ku e lo tene kuenta ku e naturalesa ku tin rondó di e área aki i laga un espasio pa e hendenan ku ke kana den e parti di naturalesa aki.

Vuurtoren

Nos ta sigui kana  den e mondi i ta sali riba e tereno di Coral Estate. Nos ta kana un pida pa despues bolbe drenta mondi pa bai wak un “vuurtoren” bieu kantu di awa. Bayendo e vuurtoren nos ta pasa dilanti di algun formashon di baranka masha bunita mes ku yen di buraku den nan. Ora awa seru kai duru e barankanan aki ta yena ku awa.

E vuurtoren ántes tabata tin un uso pero awor e ta para kompletamente dekaí na salpeter. Na kantu di e awa bo tin un bunita bista i tambe tin un piedra riba kual bo por para pa saka un bunita potrèt. Shon Tool no a pèrdè pa gana i a saka un potrèt sinta riba e piedra, i tin ku bisa ku e potrèt a sali hopi bon mes.

Boka di Sint Marie

Despues nos ta sigui kana pa bai na boka di Sint Marie. E boka ta un entrada smal kaminda e awa ta drenta bai na e “zoutpannen” . Na e boka tin un pipa ku bo tin ku pasa riba dje pa bai e otro lado, si bo no ke muha bo pia. Klaro ku esaki hopi biaha ta un hilaridat. Sr. Wawoe ta yuda algun di e damanan ku tin un tiki di ril pa krusa riba e pipa.

Fòrnu di kalki

Komo áwaseru a kai basta duru e dianan anterior e kaminda tabata hopi muha i tin momentu ku bo mester a muha bo sapatu. Ora nos sigui kana nos ta yega na un Fòrnu di kalki ku ántes e katibunan tabata usa pa kushina aden. Komo tabata tin  hopi katibu e Fòrnu aki ta unu hopi grandi pero awor aki ya no ta den uso mas i ta  den hopi  mal estado.

Nos ta kana bai te afó kaminda nos por atmirá un grupo di flamingo ku ta den e “zoutpannen”. Ta un bunita bista pa mira e flamingonan aki.

Ora nos yega afó nos ta bai na e galeria di defuntu Nena Sanchez pa un bishita.

Galeria Nena Sanchez

Nena mes a fayesé algun aña pasa pero su ruman muhé a sigui ku e galeria i ta bende tur tipo di pintura ku Nena a yega di pinta. E galeria ta hopi bon mantené i e ruman muha, sra. Ana ta konta algu di historia di e sitio kaminda e galeria ta situá ku ta Jan Kok. Den pasado Jan Kok tabata doño di e lanthùis i tabata trata su katibunan masha malu mes. Ana ta konta ku den kuminsamentu ora nan a drenta den e lanthùis tabata tin momentu ku e lanthùis tabata “spook”. Hopi ta e kosnan ku tabata den e lanthùis pero pa bo sa e detaye bo mester bishita e galeria na Jan Kok ku sigur ta bale la pena. Sra Ana mes no ta pinta pero ta na altura di delaster detaye di e Galeria. Hopi turista ta bini e galeria ya ku Nena Sanchez ta hopi konosí den eksterior. E pinturanan ta hopi agradabel i den wega nos a bisa ku e pinturanan ta asina agradabel ku nan a kore ku tur e spoki nan.   Riba e balkon di Jan Kok bo tin un bista masha bunita mes di Rif Sint Marie.

Williwood

Ora nos a kaba ku e bishita nos a sigui pa Williwood pa nos a disfrutá di un lùnch bon meresí. Tur ku a partisipá a gradisié Sr. Recheandel Wawoe pa e guia. E tour tabata hopi bon hinka den otro. Rechandeal ku frekuensia ta organista hiking tour i si bo ta interesá, por tuma kontakto kuné na telefòn 6723003

Nos ta kontentu ku nos tabata tin e oportunidat pa sera konosí ku Shon Tool i a priminti’é ku dia 7 di Novèmber 2021.  ku poder di Dios nos lo tei pa inougurashon di su kaya.

Reakshon: anthonyhaile@yahoo.com/ 5126220