Un oferta pa pidi pordon a bira litania di eksigensia!

WILLEMSTAD. Faltando solamente un siman pa kumpli ku e fecha ku Ulanda mes a stipula pa gobiernu ulandes pidi desendiente di katibunan (e.o.) den èks kolonianan ulandes pe barbaridatnan ku nán antepasadonan a kometé, e fecha di 19 desèmber proksimo yegando su momento di eksplotá.
Ku un ehempel di torpesa historiko, Ulanda unilateralmente a fiha e fecha pa na kada un dje paisnan di Antia, un (1) minister ulandes pidi pordon.
Anto no kualke minister desendiente pero un minister makamba blanku.
Aparte ku sin konsulta i aviso previo anunsiando e fecha riba kual Ulanda ke pidi pordon, e minister ta na kaminda kaba pa Surnam.
Ku e desishon aki, Ulanda a desenkadena un reakshon di rechaso i sensura ku por bai para te den e tribunalnan di mas haltu na mundu.

ULTIMATUM
KANDELOSO
Mester rekonose ku den e ánimo di rechasá loke Ulanda ke imponé riba (èks) kolonianan ulandes, Surnam tambe mas spièrtu mientras ku gobiernu di Kòrsou i Aruba mes tabata na soño.
Of nan tin miedu di protesta kontra Ulanda konsiderando kuantu kos nos pais por pèrdè si nan hunga ròl di rebelde.
Surnam tabata mas pro-aktivo ku Kòrsou i nos sosionan estatal te ku nan a fòrsa bara obligando gobiernu ulandes pa manda un minister ulandes bai tira zeta riba e olanan violento ku politikonan surinameño a krea den e forma di protesta.

DEMANDANAN
AMBISIOSO
Organisashonnan sivil rebelá tantu na Surnam komo na Ulanda i a pone un pakete di eksigensia hasta irealista komo ultimatum.
Un siman pa kumpli ku e fecha di pidi Surnam a pone machete riba mesa i Aruba tambe a bin ku nan vershon di machete.