Un kastigu ku ta hopi eksagerá: 2 aña di suspenshon pa “Security” Sendley Bito… I 3 luna pa Pedro…

Hendenan ku tabata hopi serka i ku a mira kasi tur loke a sosodé promé, esta den V.I.P ta konvensí ku a kastigá e miembro di “security” Sendley Bito demasiado fuerte. Sigur pa loke ku e hendenan ku tabata sintá na “VIP” a eksperensiá e kastigu no ta hustu.
E futbolista di Inter Willemstad ku ta Pedro, ku tambe ta DT den nos futbòl di dos divishon sintá na “VIP” a komportá malu, i dado momento e miembronan di seguridat mester a hala su atenshon.

E komportashon di Pedro, i algun otro hende mas ligá na futbòl tabata dje malu ei ku ofisial a pidi pa hala nan atenshon.

Ora a hala nan atenshon insulto a kai, i konsekuentemente e “security” pafo a regla kuenta ku Pedrinho.

Un dirigente di FFK ku 5 Star a kombersá kuné a bisa nos ku Sendley ku tabata security no mester a regla pafó ku Pedro ya ku e tabata na trabou. Sinembargo 5 Star a kombersá ku algun hende ku tabata na “VIP” i nan a desaprobá totalmente e aktitut di algun hende ligá na futbòl sintá na “VIP”.

5 Star a komprondé ku desishon a kai ku a suspendé Sendley Bito di “Bito-Security” pa 2 aña, ku un “but” di 500 florin, miéntras ku e kiper/DT a haña 3 luna.

Otronan a sali “airoso” for di e bèrgwensa ku tabatin den e sekshon di “Very Important Person” okashoná pa “Nos Hendenan” di Futbòl mes. Den kaya bo ta tende ku tin hende ku lo ke move e “security” di “Bitonan”, pa “Very Good Friends” ????.
Hecho ta, ku hopi plaka ta bai na “security” paso FIFA ta para ariba pa mantené òrdu, i nos hendenan su komportashon sa laga di deseá.
Amigu i Enemigu mester rekonosé ku “Security” di “Bitonan” a perkurá pa òrdu na futbòl.