Un dato kurioso di Monkeypox….. Kasi 100% dje kasonan ta grupo di homber ku tin sèks ku otro homber

Willemstad – Organisashon Mundial di Salú a divulga un dato kurioso tokante e malesa Monkeypox indikando ku 98% dje kasonan a keda raportá den e grupo di homber ku ta tene relashon seksual ku otro pero ku hende muhé debil tambe ta kore e risiko di haña e malesa.
Ministerio di Salú a sigui informá tokante di e malesa di Monkeypox, kual tambe ta ser yamá “apenpokken” i a informa ku luna pasá dia 23 di yüli 2022, Organisashon Mundial di Salú (WHO) a deklará e epidemia di Monkeypox komo un malesa di interes internashonal, e nivel di alerta mas haltu ku WHO por deklará.
Esaki despues ku for di luna di mei di e aña aki diferente kasonan di Monkeypox a keda raportá na WHO for di paisnan ku anteriormente no tabata tin kasonan di Monkeypox.
No opstante e echo ku tur persona sin importá sekso, edat òf nashonalidat por keda kontagiá ku e vírùs di Monkeypox, datonan internashonal ta mustra ku aktualmente alrededor di 98% di e kasonan di Monkeypox ta ser raportá bou di e grupo di hende hòmber ku ta tene relashon seksual ku hende hòmber (mihó konosí komo “men having sex with men”, MSM).
Ku e klasifikashon di Monkeypox komo un malesa di interes internashonal, WHO ta pidi tur pais pa prepará pa identifiká posibel kasonan di Monkeypox i pa tuma e medidanan nesesario pa evitá transmishon lokal di hende pa hende pero pa speshalmente duna atenshon spesial pa evitá stigmatisashon i diskriminashon di individuo i/òf gruponan den komunidat (ku ta kai den e kategoria ei).

Identifikashon
di posibel kaso
i monitoreo
Miéntras ku Ministerio di Salú a informá komunidat tokante di e malesa di Monkeypox na luna di mei di e aña aki, e departamentonan di Epidemiologia i Infectieziektebestrijding di Servisio di Salú Públiko di Kòrsou ta den preparashon pa kumpli ku e tareanan di monitoreo i kòntròl di e malesa respektivamente.

Manera den kaso di otro malesanan kontagioso un kolaborashon entre tur e partnernan, e.o. dòkternan di kas, spesialistanan i laboratorionan, ta esensial pa kontrol di un malesa den nos komunidat.