ULANDA A REKONOSÉ FAYO I PIDI DESPENSA

WILLEMSTAD – Ayera 20 di aprel 2022, na okashon di seremonia pa rekòrdá e matansa ku a tuma lugá na Muizenberg na aña 1942, representante di Ulanda na Kòrsou, den persona di Erwin Arkenbout a pidi despensa públikamente. Ta trata aki di un suseso horibel den nos historia, esta e hecho ku 15 trahadó chines, ku tabata traha via kontrakt, kendenan na e momento ei tabata den wèlga, protestando kontra di nan kondishonnan laboral, a keda matá, pero porfin a keda rekonosé komo víktimanan di guera.
E 15 siudadanonan ariba menshoná a wòrdu tirá mata dia 20 di aprel di aña 1942 pa agentenan di gobièrnu riba e isla di Kòrsou. E periodo ei Kòrsou ainda tabata den tempu kolonial. Ku esaki esfuerso i luchanan inkansabel di parti di Stichting Eerherstel Oorlogsslachtoffers Curaçao (SEOC) pa pone atenshon na héroenan, baluartenan, porfin a duna frutanan tangibel. Danki na e protagonistanan di SEOC, esta Nizaar Makdoembaks, Wim van Lamoen, Randall Brute i otronan, kendenan a mira i eksperensiá ku únikamente luchando den union i manteniendo konsistensha di bèrdat, ta e úniko faktor i òf fórmula ku por kondusí na resultadonan realista. Kasi esaki lo por keda konsiderá komo e ehèmpel linia rekta pa gobernantenan i polítikonan manera MFK, PNP, PAR, MAN, KEM, Trabou pa Kòrsou, den kaso di COHO, kaminda interesnan polítiko te ainda klaramente ta stroba un profil debido i koherente pa Kòrsou. SEOC su forma di mira kos a wòrdu di tèst dor di abogadonan pa nan balor hurídiko i a keda komprobá ku dor di negligensia i falta di investigashon adekuá durante e añanan ku a transkurí e suseso ta sigui grita pa atendementu debido. E siudadano kurasoleño, sientífiko señor Nunes Santiago a duna inisio na investigashonnan profundo ku ta tira lus riba loke a sosodé di bèrdat, pero pronto a haña respaldo di SEOC. Ku insistensia konsistente SEOC a sòru pa rekonosé e víktimanan aki di guera i nan ròl ku a kondusí na nan morto inhustamente e tempu ei, komo tal a hasi tur esfuerso pa no sera tur buraku den e proseso pa yega na e bèrdat.
Ayera representante di Ulanda na Kòrsou den persona di señor Erwin Arkenbout a papia palabranan kla i a rekonosé ku loke a hasi ku e 15 chinesnan na aña 1942 no tabata korekto, komo tal e funshonario aki a pidi despensa públikamente. Mas aleu, segun Arkenbout, Ulanda di forma spontáneo a duna un gesto na komunidat chines di 500.000 euro pa drecha e sede di chinesnan den Scharloo i a tene tur posibilidat habrí pa mas kolaborashon ku e gremio aki. Minister di Enseñansa Siensia, Kultura i Deporte, señor Sithree van Heydoorn a elogiá SEOC pa su lucha inkansabel i a aploudí e posishon pasifikadó tumá pa e representante di Ulanda na Kòrsou. Tambe e minister a duna rekonosementu na un hóben, kende a uza medionan sosial di un forma efektivo i inteligente pa sigui yama atenshon pa e suseso aki. Gobièrnu, segun minister van Heydoorn lo sigui e trámitenan nesesario pa hasi posibel ku pronto lo kombèrtí e sitio aki komo unu históriko ku propósitonan edukativo.
Wim van Lamoen prominente representante di SEOC, dirigiendo su mes na e representante di Ulanda, a suprayá ku e promé paso aki di parti di Ulanda ta esun ku sin duda ta duna apertura i komo tal por sirbi pa hasi muchu mas ku lo benefisiá tur esnan konserní.
Wim van Lamoen no a laga di rekonosé e siudadano Nunes Santiago, kende ta esun ku a start e proseso di transformashon pa loke ta e historia di e 15 chinesnan trahadó. Lo hasi tur posibel pa pronto kombèrtí e sitio aki den un área super spesial, segun Wim van Lamoen. Senor Errol Cova, oriundo di Suffisant, kende tambe a hiba palabra a bai bek na su tempu di infansia pa splika kon komo mucha nan tabata puntra nan mayoria, kiko presis a pasa ku chinesnan, pero ku e kontestanan aklaratorio kada biaha tabata sigui hasi falta.