Tweede Kamer hulandes no ta vertaalburo pa nos Staten

WILLEMSTAD. Un mensahe “klá i raspá” of di otro manera bisá “recht voor je raap” parlamento di Kòrsou por spera un dje dianan aki for di parlamento hulandes ku ta manda e mensahe ku nan no tin servisio di tradukshon di idioma Papiamentu pa idioma hulandes dje moshonnan ku nan ta aprobá den Staten i manda Hulanda pa nan konosementu.

Si parlamento di Kòrsou ke pa Tweede Kamer aktua riba e dokumentonan ku Staten di Kòrsou manda pa nan, lo ta un gran kos si Parlamento di Kòrsou manda un vershon na hulandes aserka.
Esaki lo por tin hasta benefisio adishonal ku e por krea trabou pa hende ku preparashon pero ku no ta haña chèns pa ta aktivo pasobra talbes nan koló politiko lokal no ta esun adekuado pero tin ademas e benefisio ku e traduktor kurasoleño por korehi hasta e Papiamentu ku e parlamentarionan lokal ta utilisá pasobra karamba nan ta dominá Papiamentu malu, tantu verbal komo por eskrito.
Pa kasualidat nos tabata konsiderando e dianan aki ta dediká un editorial ne tema aki pa komo preparashon pa un politiko drenta parlamento, e mester sigi un kurso di idioma Papiamentu.
Pero retornando ne tema, si parlamento di Kòrsou ke pa Tweede Kamer di Hulanda hasi algu ku e dokumentonan aki, anto lo yuda pa manda un kopia ku e tradukshon na Papiamentu.
Tòg parlamento ta gasta asina tantu plaka na kosnan inutil i inservibel ku sikiera e plaka aki lo a pa un meta util.
Komishon parlamentario hulandes pa relashon den Reino lo manda e mensahe aki via nan griffier pa nos griffier entrega na nan koleganan na Kòrsou.
Motibu pe petishon te semi avalancha di moshon ku parlamento di Kòrsou a manda pa Den Haag e dianan aki pero ku probablemente lo bai linea rekta den bak’i sushi.
Riba nan mes nan no ta buska un traduktor.
Resumiendo pues: parlamento mester tuma inisiativa pa laga tur parlamentario sigi un kurso pa kuminsá di idioma Papiamentu mes pasobra e manera ku tin biaha sierto miembronan ta masakrá nos idioma materna ta duna hende gana di bula den laman na Noordkant!