Turkia ta sigi: Ku su parti negativo pa ingreso di Suesia i Finlandia den OTAN

ANKARA – Recep Tayyip Erdogan presidente di Turkia a manda un mensahe kla i raspa den direkshon di OTAN ayera ku e no lo aseptá e ingreso di Suesia i Finlandia den OTAN miéntras nan no entrega 33 miembro di e partido PKK.
Recep Tayyip Erdogan a bisa ku tantu Suesia komo Finlandia ta bon na altura ku nan a duna asilo polítiko na gruponan ku ta keda konsiderá komo teroristanan na Turkia.
Ta trata aki di un total di 33 miembro di e Partido “Kurdistan Workers Party” ku a haña asilo polítiko na Suesia i Finlandia segun Recep Tayyip Erdogan.
Segun Recep Tayyip Erdogan a yega momentu pa negoshá ku Suesia i Finlandia ku si nan kier Turkia su aprobashon pa bira miembro di OTAN a kambio nan mester entreganan tur e 33 teroristanan di partido PKK.
OTAN tin 30 miembro di kual Turkia ta e úniko pais ku ta para firme ku ta kontra i lo no kambia di desishon miéntras Finlandia i Suesia entrega nan e 33 teroristanan di partido PKK.