Turismo for di Merka no ta kos di kanta makamba

WILLEMSTAD. For di Estádos Unídos un kantidat di 4.761 turista a bishita Kòrsou na mei. Pa loke ta trata Canada, e total di turista risibí na mei tabata 352. Pues total nos a risibí 5.113 turista for di Nort Amérika.
Di e turistanan prosedente di Nort Amérika 68% a keda den un ‘resort hotel’.
For di region di Sur Amérika un total di 5.327 turista a keda risibí. Di e turistanan aki un total di 2.297 esta 43% ta prosedente di Colombia.
Turismo for di Sur Amerika ta debil.
Miéntras 740 esta 14% a bishitá nos for di Brazil. For di Sürnam 526 turista a keda risibí kual ta 10%.
Un total di 55% di tur e bishitantenan prosedente di Sur Amérika a keda den un ‘resort hotel’. For di region Karibe, Kòrsou a risibí 2.738 turista di estadia na mei, primordialmente for di e paisnan di Karibe Hulandes. Na luna di mei un total di 8 barku krusero a bishitá nos pais ku un total di 28.362 turista krusero.