Tres skol di enfermeria na Florida a bende un total di 7.600 título falsu

FORT LAUDERDALE – Markenzy Lapointe fiskal federal pa distrito di Florida a konfirmá ayera ku un total di 25 persona a keda detené relashoná ku benta di 7.600 titulo di enfermeria falsu.
Esnan ku a keda detené tabatin residensia na Florida , New York, Texas i Delaware segun fiskal general Markenzy Lapointe.
Detayenan di e informashon aki ta ku e skolnan tabata kobra $15.000 pa titulo di enfermeria sin ku e studiante mester a pone pia den klas.
E kantidat di plaka ku e chanchuyo mayúskulo aki a generá ta $114 mion.
E skolnan di enfermeria ku a keda menshoná den e kaso aki ta Sacred Heart International Institute na Fort Lauderdale, Siena College of Health na Lauderhill i Palm Beach School of Nursing na West Palm Beach.
Markenzy Lapointe a splika ku konsekuensia di lokual a pasa aki tin ta ku tur esnan ku a haña un titulo sin entrenamentu lo no por sigi traha mas den e sektor di enfermeria.