Tres Networks ta bira Digicel+

WILLEMSTAD – Internèt di fibra óptiko di Tres Networks entrante 24 di mei lo yama Digicel+. Aki no ta trata di un atkisishon, CEO di Digicel Sur Caribe, Roeland van der Hoeven ta enfatisá, pa motibu ku Tres Networks pa e ultimo añanan ya ta parti di Digicel Kòrsou. “A bira tempu pa Tres Networks nabegá bou di e bandera di Digicel. Esei te. Únikamente e nòmber lo kambia, i nada mas.”

Pa motibu ku nada no ta kambia, e CEO ta masha trankil sabiendo ku klientenan di e anterior Tres Networks, lo sigui risibi “e mihó ret di fibra óptiko, ku e mihó spit i e mihó kobertura”. Kada bes ekspandiendo su ret pa mas bario na Kòrsou.” Di akuerdo ku Van der Hoeven nada lo kambia na e Término i Kondishonnan eksistente di e aktual akuerdo ku kliente. “Awòki no, i despues tampoko. Mi por bisa esei den tur sinseridat.”

Di akuerdo ku Van der Hoeven, e kompania mama a deliberá bastante pa kambia e nòmber, pa motibu ku Tres Networks tin un reputashon sólido. “Tres Networks ta konosí na Kòrsou pa kalidat i konfiabilidat. Esaki ta algu delikado. Dor di kambia e nòmber bo ta kore un rísiko grandi di perhudiká e empresa. Ku Digicel a disidí tòg pa hasi esaki, ta pasobra ku e ta sinti mas sinsero. E CEO ta kontinuá bisando: “Tres Networks ta Digicel, nos ta un famia. Asina simpel e ta. Dor di yam’e próksimamente Digicel+, nos ta rekonos’é komo tal, pa nos mes i den públiko. Kompará esaki ku un eskritor ku a disidí ku e ta bai skibi bou di su propio nòmber, i no mas ku un seudónimo. Finalmente e ta laga mira su propio kara. Esei ta honesto, direkto i mas simpel. Awor no sá presis ken ta ken.”

Digicel+, e anterior TRES Networks, ta e ret moderno di internèt fibra óptiko pa kas i negoshi ku ta brinda un eksperensia riba banda hanchu super-lihé i konfiabel kompañá pa servisio di nivel haltu. Di akuerdo ku Van der Hoeven e desaroyo, i ekspanshon di e ret aki ta un prioridat pa Digicel. E CEO ta kontinuá: “Dor di invertí den e ret aki, nos ta demostrá ku nos tin konfiansa den nos komunidat i den e futuro desaroyo di Kòrsou.” Van der Hoeven ta menshoná ku e invershonnan menshoná ta un promesa ku klientenan por tene na dje.”

E operashonnan ku lo mester hiba e ret fiber-to-home entrante dia 24 di mei pa bario- i distritonan nobo, a keda boutisá ku e nòmber ‘Simplemente Mas’. Di akuerdo ku e CEO, e klientenan aktual di Digicel+ mes tambe lo ripará ku Digicel ta invirtiendo intensamente den mehorashon i ekspanshon di su servisionan. “E servisio na kliente di Digicel+”, segun e CEO, “lo bira mas lihé, mas stabil i mas konfiabel. Por yam’é trankil un ‘upgrade’ total di e ret.”Na e upgrade ta pertenesé tambe, segun Van der Hoeven un aktualisashon di e katálogo di Televishon. “Nos lo bai ofresé mas kontenido i paketenan atraktivo.

Di esei nos lo informá nos klientenan pronto.”