Tres funshonario polisial prohibi pa drenta warda

WILLEMSTAD. Kuerpo polisial di Kòrsou a drenta un era bergonsoso di inmoralidat ku desgrasiadamente no a inisia tempu ku polisnan ku a hura di protehá komunidat a hòrta 600 kilo di droga di nan doño di trabou na Rio Canario pero ku después e bagamunderianan aki a haña ramifikashon serio.
Despues di a praktiká e profeshon aki mas ku 50 aña i a traha di aserká banda i ku agentenan polisial, nos por bisa ku outoridat ku semper tabatin ilegalidat den Kuerpo Polisial. Solamente ku antes tabatin outoridatnan fuerte ku tababata bati kabes dje bagmunderianan aki ku moekel i kòrté den tòm pero awor ta hefenan i sup-hefenan mes ta hunga ròl di Django den e bagamunderianan aki.
I nos no ta referi na e ultimo eskandalito ku organisashon di prostitushon den seno di kuerpo di polis i ku sierto hefenan mes ta hunga ròl di chulo, sino ku semper a faya di kòrta kabes dje kolebra i a laga e kos aki hiba su bida.
Es ku ministernan mes ta duna e mal ehempel ora ku alto mando skòrs un polis pa investiga iregularidat, un otro minister ta tumé den servisio manera nada a pasa.
Den e kaso aki minister di Hustisia ta e propio promé minister kende a drenta den funshon den un nubia di sospecho ku si ta bèrdat ela kai den baño of ta un ‘man misterioso’ a dal e pa kasi bula kashi di wowo.
Pa no papia mes dje hecho ku pasobra e tabata polis e ta kapas pa ta promé minister. I asina e komparashon pa sigi konta pa mayoria di e ministernan den funshon.
Biniendo bèk riba e tema di Sodoma i Gomora ku ta birando un mancha grandi den Kuerpo Polisial, te ne momentonan aki ni promé minister ni minister di Hustisia no a sali komentá ni un palabra.
Un hecho konstante tin den e skandal aki i esei ta ku artrobe ela originá den e sekshon di komunikashon.
Pió dje kaso ta ku esun na mando tabata praktikamente moralisador kontra e malhechornan den nos komunidat i awor e mes a bai forma parti di nan fila.
Esta bergwensa ku hasta Juan Bimba ta hasi mofa di warda di polis komo un sentro di prostitushon den dekadensia.