Tiroteo na un skol na Oakland a laga un saldo di 6 herido

OAKLAND – Ray Kelly bosero di departamento di Polis na Oakland a konfirmá ku ayera alrededor di 1’or di mèrdia 5 hòmber a drenta na kura di un skol sekundario na e kondado di Alameda i herida 6 adulto.
Segun testigunan ku a presensia lokual a pasa ta ku e 5 hòmber a drenta propiedat di e skol ku kara tapa i a bai dirèkt riba e hendenan ku nan a bin pa tira.
Ray Kelly a splika ku tur e seis víktimanan a risibí herida di bala di kual tin tres di nan den estado kritiko.
Tres di e víktimanan a keda interná na Hospital Highland na Oakland e sobra otro tres a keda trasladá pa Centro Médiko Eden na Castro Valley
Mester bisa si ku e skol kaminda tabatin bashamentu di bala ta keda na un zona rural ku tin hopi aktividat di geng.
Kaminda e insidente lamentabel a tuma luga ta na Sojourner Truth Independent Study pa hendenan mayor di edat ku no a gradua na skol sekundario.