Tiroteo na fábrika na Maryland a laga un saldo di 3 morto i 4 herido

MARYLAND – Doug Mullendore hefe di kuerpo polisial na Maryland a konfirmá ku ayera alrededor di 2’or di atardi un empleado ku tabata laborá na un mashin shop a kana drenta ku un arma semi- outomátiko i los bala riba su koleganan.
Ta trata aki di un hòmber hispano (23) ku tabatin problema ku algun kolega i ku ayera tardi a bin regla kuenta ku nan di e forma aki.
Doug Mullendore a splika ku esnan ku a fayesé den e kaso aki a keda identifiká komo Mark Alan Frey (50), Charles Edward Minnick Jr. (31) i Joshua Robert Wallace (30).
Tin un di kuater víktima ku ta den estado kritiko ku a keda identifiká komo Brandon Chase Michael (40).
Pa lokual ta e empleado asesino aki ku a kometé e krímen aki a risibí vários tiru di bala durante su konfrontashon ku polis.
Doug Mullendore a deklará ku e fábrika lo keda sera te ku otro siman pa asina outoridatnan atendé ku e investigashon.