‘TINA’ dokumental nobo di Tina Turner

** E gran Tina Turner ta tuma despedida di su fanátiko ku un konmovedor pelíkula nobo tokante su bida, kon e la logra superá su doloroso pasado i finalmente kon e la logra haña felisidat.

Den e dokumental “Tina”, e kantante ta mira bek den su pasado, añanan di su hubentut yen di lucha i doló, despues fama mundial i finalmente haña e amor di su bida ya na edat mediano.

Awor aki ku 81 aña di edat e leyenda di músika soul i rock tin vários problema di salú, inkluyendo un ataka selebral, kanser, tambe a hasi un transplante di nir na 2017.

Den e dokumental, Tina ta konta di kier drenta e di tres etapa di su bida mas trankil i for di atenshon públiko i a splika ku e ta sufri di trastorná di stress pos traumatiko pa kousa di e abuso doméstiko ku e la sufri den pasado na man di su eks kasá i sosio musikal Ike Turner.

Anna Mae Bullock, mihó konosí komo Tina Turner a splika ku e no tabatin un bon bida. Mas bien un bida abusivo. Su infansia tabata yena ku pobresa i miseria, pikiendo katuna den terenonan alrededor di Nutbush, Tennessee. Su mama Zelma tambe tabata sufri abuzu doméstiko na man di su tata Floyd Bullock i despues tur dos a bandoná Tina ku tabata un mucha di apénas tres aña. Hasta despues ku Tina ya tabata e gran diva i a bishitá su mama, Zelma ainda a trat’é friu i poko kariñoso.

Apesar di e forma di su mama, tòg Tina tabata preokupá pa nesesidatnan di su mama ku na final tòg Semper tabata bisa ku su yu no por a yega na e kosnan ei ni fama.

Mas aleu e kantante di “What love got to the with it” ta splika ku tabata difísil kita for di su kasa abusivo. Ya e tabatin un yu hòmber Craig, tambe unu ku Ike, (Ronnie) i dos mas ku e la adoptá di su kasa kual ta Ike Jr. I Michael.

E kantante ta konta ku e esena den kual e tabata duna su kasa sobredósis di remedi pa e por a skapa na 1968 kada biaha ta sigui bini den su pesadianan. “E ta manera un maldishon.” Pero e mihó remedi pa trouma ta pordon i esaki e la haña despues di a pordoná Ike, kende a muri di sobredósis di droga na 2007. “Hopi tempu mi a odi’é pero despues di su morto mi a ripara ku e tabata un persona ku tin malesa. E la yuda mi krese den mi karera i tabata bon ku mi den prinsipio. Kiermen e tabatin su parti bon i kisas ta un hende ku mester a pasa den mi kaminda”.

Na añanan 80, despues di a bai komo solista, Tina a konosé hopi éksito ku su álbumnan “Private Dancer” i “Break Every Rule”, i kombertí den un di esnan mas grandi den músika. Tambe e la subi pantaya grandi huntu ku Mel Gibson den e pelíkula di akshon “Mad Max: Beyond Thunderdome” na 1985.

Ademas di hopi premio Grammy i otronan, tambe prome muhé di koló riba portada di Rolling Stone, tòg e tabata sinti hopi soledat. Tur esaki ta kambia ora Tina konosé e produktor di disko aleman Erwin Bach durante un bishita na Europa. E tempu ei Tina Turner tabatin 46 aña, miéntras ku Bach 30. Na 2013 na ta kasa i por bisa ku te awor nan ta bibando un bida sin problema.

E último álbum di Tina (59) tabata na 1999 i na 2009 su último konsierto.Aña pasa e gran kantante aki a hasi un ‘come-back’ chikitu i hasi un remix huntu ku Kygo dje kansion “What’s Love Got To Do With It” na su edat di 80 aña. E kansion a bai para den tòp di hit parade. E salu di Tina a bai asina atras un temporada te ku e tabata pensa na kita su bida, pero despues di e operashon nir (ofresé pa su aktual kasa Bach), su salu a mehorá un poko mas.

Aktualmente Tina i Bach ta bibando na Suesia, alehá di hopi publisidat. Su salú nos ta 100 porshento i aktualmente tin problema tambe ku kanser.Anna Mae Bullock, (Tina) un di e kantantenan ku mas energia riba esenario, awkai i semper a ofresé mundu tremendo espektakulonan.